ডিজিটেল ডেস্ক: ৰাজ্যৰ প্ৰশাসনিক কাম-কাজক অধিক গতিশীল আৰু নিয়াৰি কৰি তুলি তুলিবলৈ এক বিশেষ ব্যৱস্থা হাতত লৈছে পশ্চিম বংগৰ মমতা বেনাৰ্জী চৰকাৰে। এই লক্ষ্য আগত ৰাখি ৰাজ্যখনত নতুনকৈ সাতখন জিলা গঠন কৰিবলৈ আগবাঢ়িছে দিদিৰ চৰকাৰ। বংগৰ কেবিনেটে ইতিমধ্যে নতুন জিলা গঠনৰ এই প্ৰস্তাৱত অনুমোদন জনাইছে।
মুখ্যমন্ত্ৰী মমতা বেনাৰ্জীয়ে ইতিমধ্যে চৰকাৰৰ এই নতুন সিদ্ধান্তৰ কথা সদৰি কৰিছিল। সোমবাৰে দিনৰ ভাগত সংবাদ মাধ্যমৰ আগত এই বিষয়টো অৱগত কৰাৰ লগতে ৰাজ্যিক কেবিনেটেৰ সন্মতিৰ বিষয়েও উল্লেখ কৰে।
মমতা বেনাৰ্জীয়ে লগতে নতুনকৈ গঠন হ’বলগীয়া জিলাকেইখনৰ নামো ঘোষণা কৰে।
এই নতুন জিলাকেইখন হৈছে ক্ৰমে বঢ়মপুৰ, কান্দি, সুন্দৰবন, বছিৰহাট, ইচামতী, ৰাণাঘাট আৰু বিষ্ণুপুৰ।
উল্লেখ্য যে ৰাজ্যখনত বৰ্তমানলৈকে মুঠ ২৩ খন জিলা আছে। এতিয়া আনুষ্ঠানিকভাৱে এই জিলাকেইখনৰ নাম ঘোষণা কৰাৰ পিছত পশ্চিম বংগত মুঠ জিলাৰ সংখ্যা ৩০ খনলৈ বৃদ্ধি পাব।
প্ৰকাশিত বাতৰি অনুসৰি মুখ্যমন্ত্ৰী মমতা বেনাৰ্জীয়ে প্ৰশাসনিক ব্যৱস্থাটোৰ বিকেন্দ্ৰীকৰণৰ ওপৰত গুৰুত্ব আৰোপ কৰিছে আৰু সেই কাৰণে তেওঁ জিলাসমূহ সৰুকৈ গঠন কৰিব বিচাৰিছে।
ইয়াৰ ফলত মূলত: প্ৰশাসনিক কাৰ্যকলাপ সূচাৰুৰূপত আৰু তড়িৎগতিত সম্পন্ন হ’ব বুলি মমতা বেনাৰ্জীয়ে মত পোষণ কৰি এই লক্ষ্য আগত ৰাখিয়েই এই সাতখন জিলা গঠন কৰাৰ সিদ্ধান্ত লোৱা হৈছে বুলি জানিব পৰা গৈছে।
ইফালে মুখ্যমন্ত্ৰী মমতা বেনাৰ্জীয়ে লগতে ৰাজ্যিক কেবিনেটত শীঘ্ৰেই চাৰিৰ পৰা পাঁচজন নতুন মুখক দায়িত্ব অৰ্পণ কৰা হ’ব বুলি ঘোষণা কৰিছে। অহা ৩ আগষ্ট, বুধবাৰে কেবিনেটৰ এই ৰদবদল কৰা হ'ব বুলি তেওঁ লগতে সদৰি কৰে।
Continue Reading
