প্ৰথমে কোনে জেলেপি খাব? এই কথাৰ বাবেই হত্যাৰ বলি হ’ল এজন মেধাৱী ছাত্ৰ

দোকানখনত তেতিয়া জেলেপি কমকৈ আছিল। সেই সময়তে যুৱকসকলৰ মাজত ‘প্ৰথমে মই খাম, প্ৰথমে মই খাম’ বুলি কাজিয়া লাগে। লাহে লাহে কাজিয়াখনে তীব্ৰ ৰূপ ধাৰণ কৰে। এই সময়ছোৱাতে এজন যুৱকে আন এজন যুৱকক তীব্ৰভাৱে প্ৰহাৰ কৰে। এই প্ৰহাৰত মৃত্যুক সাবটি লয় নাচিম নামৰ যুৱকজনে। পৰিয়ালৰ লোকসকলৰ মতে, কোনোবাই এই আক্ৰমণৰ বিষয়ে তেওঁলোকক জনাইছিল। তেওঁলোক লৰালৰিকৈ ঘটনাস্থলীত উপস্থিত হৈছিল। তেওঁলোকে দেখিছিল যে নাচিমে বিষত কেঁকাই আছে। তেওঁৰ পেটত তীব্ৰ বিষ হৈছিল। এই সময়ত পৰিয়ালে নাচিমক গ্ৰাম্য চিকিৎসকৰ ওচৰলৈ লৈ যায় যদিও তেতিয়ালৈকে তেওঁৰ মৃত্যু হয়। ঘটনাৰ পিছতে গাঁওখনত দুই পক্ষৰ মাজত সংঘাত আৰম্ভ হৈছে। মৃতকৰ পিতৃয়ে জনোৱা মতে মহম্মদ নাচিম পাঁচটি সন্তানৰ ভিতৰত দ্বিতীয় পুত্ৰ আছিল। 

জুলাই মাহত হ’বলগীয়া নীট পৰীক্ষাৰ বাবে প্ৰস্তুতি চলাই আছিল নাচিমে। প্ৰথম শ্ৰেণীত আইএছচি পাছ কৰি দৰভঙাত পঢ়া-শুনা কৰিছিল আৰু এইকেইদিন ঘৰত আহি থাকিছিলহি। অভিযুক্ত যুৱককেইজনক এতিয়াও গ্ৰেপ্তাৰ কৰা হোৱা নাই, যাৰ বাবে পৰিৱেশ উত্তেজনাপূৰ্ণ হৈ আছে। আৰক্ষী বিষয়াসকলে ক্ষুব্ধ লোকসকলক শান্ত কৰি অতি সোনকালে অভিযুক্তক গ্ৰেপ্তাৰ কৰাৰ আশ্বাস প্ৰদান কৰে। গাঁৱত পৰিস্থিতি স্বাভাৱিক নোহোৱা পৰ্যন্ত আৰক্ষী বাহিনী মোতায়েন কৰা হৈছে। মেধাৱী নাচিমৰ হত্যাকাণ্ডত সমগ্ৰ গাঁওখনতে পৰিছে গভীৰ শোকৰ ছাঁ।