ডিজিটেল ডেস্ক: নিৰ্বাচনী ধুমুহাই আকাশ কঁপাইছে মহাৰাষ্ট্ৰৰ৷ মহাৰাষ্ট্ৰ বিধানসভা নিৰ্বাচনৰ বাবে মনোনয়ন দাখিল কৰিছে শিৱসেনাৰ মুৰব্বী তথা মুখ্যমন্ত্ৰী একনাথ সিন্ধে। একনাথ সিন্ধে কোপৰি পাচপাখৰী আসনৰ পৰা মনোনয়ন দাখিল কৰিছে মুখ্যমন্ত্ৰী গৰাকীয়ে।
মনোনয়ন দাখিল কৰাৰ সময়ত তেওঁৰ সৈতে পৰিয়ালৰ সদস্যৰ লগতে উপ মুখ্যমন্ত্ৰী আৰু বিজেপি নেতা দেৱেন্দ্ৰ ফাডনৱিছো উপস্থিত থাকে। মুখ্যমন্ত্ৰীগৰাকীক সমৰ্থন কৰিবলৈ শিৱসেনাৰ বহু নেতা-কৰ্মীও উপস্থিত থাকে। মনোনয়ন দাখিল কৰাৰ পাছতে শিৱসেনাৰ শক্তিৰ প্ৰদৰ্শন কৰি এক ডাঙৰ ৰেলী উলিয়াই। ৰেলীত শিৱসেনাৰ নেতা, বিধায়ক আৰু সাংসদ সকলেও অংশগ্ৰহণ কৰে।
মুখ্যমন্ত্ৰী একনাথ সিন্ধে মনোনয়ন দাখিলৰ সময়ত প্ৰদান কৰা শপতনামা অনুসৰি ২০১৮-১৯ বৰ্ষৰ তুলনাত ২০২৩-২৪ বৰ্ষত প্ৰায় ৫০ শতাংশ আয় হ্ৰাস পাইছে বুলি প্ৰকাশ কৰিছে। ২০২৩-২৪বিত্তীয় বৰ্ষত একনাথ সিন্ধেৰ আয় আছিল ৩৪ লাখ ৮১ হাজাৰ ১৩৫ টকা, যিটো ২০১৮-১৯ চনত আছিল ৬১ লাখ ৮৪১ টকা। একে সমসয়তে বৃদ্ধি পাইছে তেওঁৰ পত্নীৰ আয় ৫৯ শতাংশ বৃদ্ধিৰে ৯,৯৪,০৯৬ টকাৰ পৰা ১৫,৮৩,৯৭২ টকালৈ বৃদ্ধি পাইছে।
মুখ্যমন্ত্ৰী সিন্ধেৰ শপতনামা অনুসৰি তেঁওৰ হাতত নগদ ২৬ হাজাৰ টকা থকাৰ লগতে ১.৪৪ কোটিৰ আধিকাৰী হোৱাৰ বিপৰীতে পত্নীৰ হাতত নগদ ২ লাখ টকা আৰু ৭.৭৭ কোটি টকাৰ অধিকাৰী। ইয়াৰ উপৰিও মুখ্যমন্ত্ৰীৰ প্ৰায় ১৩.৩৮ কোটি আৰু পত্নীৰ ১৫.০৮ কোটি টকাৰ স্থাৱৰ সম্পত্তি আছে বুলি তথ্য প্ৰকাশ কৰিছে৷ একে সময়তে একনাথ সিন্ধে শপতনামাত তেওঁৰ ৫.২৯ কোটি টকাৰ ঋণ থকাৰ পৰিৱৰ্তে তেওঁৰ পত্নীৰ ৯.৯৯ কোটি ঋণ থকা বুলি প্ৰকাশ কৰিছে।
উল্লেখনীয় যে একনাথ সিন্ধে কোপৰি পাচপাখৰী পৰা ধাৰাবাহিকভাৱে জয়লাভ কৰি অহিছে৷ এই সমষ্টিৰ পৰা আকৌ এবাৰ নিজৰ ভাগ্য পৰীক্ষা কৰিবলৈ ওলাইছে একনাথ সিন্ধে৷ সিন্ধেৰ সৈতে নিৰ্বাচনী যুঁজ হ’ব উদ্ধৱ গোটৰ কেদাৰ দিঘেৰ লগত৷ উদ্ধৱ ঠাকৰেৰ সৈতে বিবাদৰ পাছত এই নিৰ্বাচন অগ্নিপৰীক্ষাতকৈ কম নহ’ব একনাথ সিন্ধেৰ বাবে।
এই বিবাদৰ পাছত একনাথ সিন্ধে যেতিয়া প্ৰথমবাৰৰ বাবে বিধানসভালৈ গৈছিল তেতিয়া শিৱসেনাৰ বিধায়কসকলক প্ৰতিশ্ৰুতি দিছিল যে তেওঁ ৮০খন আসনৰ ৪০খন আসনতে জয়ীহৈ আহিব, নহ’লে তেওঁ কৃষি কৰ্ম কৰিব। এই প্ৰতিশ্ৰুতি পালন কৰিব পাৰিবনে একনাথ সিন্ধে, সেয়া সময়ে ক’ব৷
Continue Reading
