পত্নীয়ে নাৰান্ধিলে 'মাটন',স্বামীয়ে গোটেই নিশা আৰক্ষীক কৰিলে হাৰাশাস্তি! তাৰপাছত?

ডিজিটেল ডেস্কঃ পত্নীয়ে ছাগলী মাংস ৰান্ধি নিদিয়া বাবে খঙত উতলা হৈ পৰিল স্বামী। সেই সময়ত পাছে স্বামী সুৰাৰ ৰাগীত মতলীয়া হৈ আছিল। পত্নীয়ে মাটন ৰান্ধি নিদিয়াৰ খঙত মাতাল স্বামীয়ে আৰক্ষীক অভিযোগ দিবলৈ বাৰে বাৰে ১০০ লৈ ফোন কৰিবলৈ ধৰে। এই ঘটনা তেলেংগানাৰ ৰাজধানী হায়দৰাবাদৰ। নবীন নামৰ ২০ বছৰীয়া যুৱকজনে পত্নীৰ বিৰুদ্ধে অভিযোগ দিবলৈ নিশা ছবাৰকৈ আৰক্ষীৰ সহায় নম্বৰ 'ডায়েল ১০০' লৈ ফোন কৰে। আৰক্ষীয়ে প্ৰথমতে বুজায় দিয়ে যে এই অভিযোগ দাখিল কৰিব নোৱাৰি কিন্তু নবীন সন্মত হোৱা নাছিল। বাৰে বাৰে আৰক্ষীলৈ ফোন কৰি থকাত আৰক্ষী হায়ৰাণ হৈ নবীনক বিচাৰি তেওঁৰ ঘৰত উপস্থিত হয়। নবীনক আটক কৰি থানালৈ লৈ আনে আৰক্ষীয়ে। নবীনৰ বিৰুদ্ধে ভাৰতীয় দণ্ডবিধিৰ (আইপিচি) ধাৰা ২৯০ (ৰাজহুৱা উপদ্ৰৱ) আৰু ৫১০ (এজন সুৰাপায়ীৰ দ্বাৰা ৰাজহুৱা অসদাচৰণ)ৰ অধীনত গোচৰ ৰুজু কৰা হয়। অৱশ্যে পাছত আৰক্ষীয়ে তেওঁক সতৰ্কবাণী দি এৰি দিয়ে। আৰক্ষীয়ে নবীনক ডায়েল ১০০ সুবিধাৰ অপব্যৱহাৰ নকৰিবলৈ আহ্বান জনায়।নবীনৰ পত্নীয়ে আৰক্ষীক কৈছিল যে তেওঁৰ স্বামীয়ে সুৰাপান কৰি অহাৰ বাবে তেওঁ বিৰক্ত হৈছিল আৰু সেয়েহে তেওঁ স্বামীৰ বাবে মাটন ৰন্ধা নাছিল। আৰক্ষীয়ে নবীনক বুজায় যে এনেকুৱা কৰিলে মূল্যৱান সময় অপচয় হয় আৰু কিছুমান জৰুৰীকালীন ফোন কল পোৱাত সমস্যা হয়। আৰু পঢ়কঃ ১২৫ বছৰীয়া যোগ গুৰু স্বামী শিৱানন্দলৈ পদ্মশ্ৰী সন্মান; প্ৰধানমন্ত্ৰীয়ে দোৱালে মূৰ