পুলৱামাৰ শ্বহীদ মনেশ্বৰক সশ্ৰদ্ধ স্মৰণ

ডিজিটেল ডেস্কঃ ২০১৯ চনৰ ১৪ ফেব্ৰুৱাৰীৰ দিনটোতে জম্মু-শ্ৰীনগৰ সংযোগী ৰাষ্ট্ৰীয় ঘাইপথৰ পুলৱামাত কেন্দ্ৰীয় সংৰক্ষিত আৰক্ষী বাহিনীৰ জোৱান কঢ়িয়াই নিয়া বাহনৰ ওপৰত চলিছিল এক ভয়ংকৰ আত্মঘাতী আক্ৰমণ। জম্মু-কাশ্মীৰৰ পুলৱামাৰ অৱন্তীপুৰত পাকিস্তানৰ ইছলামিক সন্ত্ৰাসবাদী সংগঠন জেইছ-ই-মহম্মদে সংঘটিত কৰা এই আক্ৰমণত শ্বহীদ হৈছিল দেশৰ ৪৪গৰাকী চি আৰ পি এফৰ বীৰ জোৱান৷ উল্লেখ্য যে, সমগ্ৰ দেশ কঁপাই যোৱা এক ভয়ংকৰ আক্ৰমণটোৱে আজি তৃতীয় বৰ্ষত ভৰি দিলে। সেয়েহে তৃতীয় মৃত্যুবাৰ্ষিকী উপলক্ষে শ্বহীদ হোৱা বীৰ জোৱাসকলক দেশবাসীয়ে শ্ৰদ্ধাৰে স্মৰণ কৰে। এইসকলৰ বীৰ শ্বহীদসকলৰ ভিতৰত আছিল বৰ্তমানৰ তামুলপুৰ জিলাৰ কলবাৰী গাঁৱৰ চি আৰ পি এফৰ ৯৮নং বেটেলিয়নৰ হেড কনিষ্টবল বীৰ শ্বহীদ মনেশ্বৰ বসুমতাৰী৷ আজি এই বীৰ শ্বহীদগৰাকীৰ তৃতীয় মৃত্যুবাৰ্ষিকী তিথিত বীৰ শ্বহীদগৰাকীক পৰিয়ালে স্মৰণ কৰে৷ বাথৌ ধৰ্মৰ আৰজ পৰিৱেশন কৰি শ্বহীদগৰাকীৰ প্ৰতিমূৰ্তিত মাল্যাৰ্পন কৰাৰ লগতে বন্তি প্ৰজ্বলন কৰি পৰিয়ালৰ লগতে গাঁওবাসীয়ে শ্ৰদ্ধাঞ্জলি জ্ঞাপন কৰে৷ আনহাতে, ভাৰতীয় সেনাবাহিনীৰ বিহাৰ ৰেজিমেণ্টৰ উচ্চপদস্থ বিষয়াসকলে শ্বহীদগৰাকীৰ ঘৰত উপস্থিত হৈ বীৰ শ্বহীদগৰাকীৰ প্ৰতিমূৰ্তিত পুষ্পাঞ্জলি প্ৰদানেৰে শ্ৰদ্ধা নিবেদন কৰে৷ স্থানীয় কলবাৰী হাইস্কুলতো আজি বি টি চি প্ৰশাসনে স্থাপন কৰা শ্বহীদ মনেশ্বৰ বসুমতাৰীৰ প্ৰতিমূৰ্তিত আজি শিক্ষানুষ্ঠানখনৰ শিক্ষক, ছাত্ৰ-ছাত্ৰীসকলেও শ্ৰদ্ধাঞ্জলি জনায়৷