ভাৰতত সৰ্বাধিক সংখ্যক ধৰ্ষণৰ কাৰণ হিজাব: কৰ্ণাটকৰ কংগ্ৰেছ নেতা

ডিজিটেল ডেস্ক: ‘হিজাব পৰিধান নকৰাৰ বাবে ভাৰতত সৰ্বাধিক সংখ্যক ধৰ্ষণকাণ্ড সংঘটিত হয়...’- কৰ্ণাটকত চলি থকা হিজাব বিতৰ্কৰ মাজতে, প্ৰদেশ কংগ্ৰেছৰ নেতা জামিৰ আহমেদে কৰা এক মন্তব্যই চাঞ্চল্যৰ সৃষ্টি কৰিছে৷ দেওবাৰে তেওঁ কৈছিল যে, ভাৰতত উচ্চ সংখ্যক ধৰ্ষণৰ ঘটনা নথিভুক্ত কৰা হৈছে কাৰণ ইয়াত মহিলাসকলে হিজাব পৰিধান নকৰে। আহমেদে কয়, 'যুৱতীসকল যিমানেই ডাঙৰ হৈ আছে৷ তেওঁলোকৰ সৌন্দৰ্যই সকলোকে মুহিত কৰে৷ এই সৌন্দৰ্য লুকুৱাবলৈ তেওঁলোকৰ মুখখন আৱৰণেৰে ঢাকি ৰাখিব লাগে। মই ভাবো যে ভাৰতত বিশ্বত সৰ্বাধিক সংখ্যক ধৰ্ষণৰ ঘটনা আছে। ইয়াৰ কাৰণ কি? কাৰণটো হ'ল তেওঁলোকে তেওঁলোকৰ মুখ ঢাকি নাৰাখে। হিজাব পিন্ধাটো বাধ্যতামূলক নহয়, আৰু বহু বছৰ ধৰি এইটো প্ৰথা হৈ আহিছে৷' কৰ্ণাটক উচ্চ ন্যায়ালয়ৰ তিনিজনীয়া বিচাৰপীঠে শিক্ষানুষ্ঠানসমূহত ৰাজ্য চৰকাৰে আৰোপ কৰা 'হিজাব নিষেধাজ্ঞা'ক প্ৰত্যাহ্বান জনোৱা আৱেদনৰ শুনানি পুনৰ আৰম্ভ হৈছে৷ এই শুনানি কৰাৰ এদিন আগতে আহমেদে কৰা এই মন্তব্যই তোলপাৰ লগাইছে ছ’চিয়েল মিডিয়া। লগতে সোমবাৰৰ পৰা, দক্ষিণৰ ৰাজ্যখনত দশম শ্ৰেণীলৈকে বিদ্যালয় পুনৰ খুলিব বুলি ঘোষণা কৰা হৈছে৷ ৮ ফেব্ৰুৱাৰীত, মুখ্যমন্ত্ৰী বাসবৰাজ বোম্মাই শৈক্ষিক প্ৰতিষ্ঠানসমূহ বন্ধ ৰখাৰ নিৰ্দেশ দিছিল৷ বিদ্যালয়ৰ চৌহদত হিজাব পিন্ধাৰ সপক্ষে আৰু বিপক্ষে প্ৰতিবাদৰ সময়ত কেইবাখনো জিলাত হিংসাত্মক ঘটনা সংঘটিত হৈছিল। বিগত বছৰৰ ডিচেম্বৰত কৰ্ণাটক বিধানসভাৰ প্ৰাক্তন অধ্যক্ষ কে আৰ ৰমেশ কুমাৰে ধৰ্ষণৰ ওপৰত ‘অফ দ্য কাফ’ বুলি কৰা মন্তব্যৰ বাবে ব্যাপক ক্ষোভৰ সৃষ্টি হৈছিল।