পুনৰ জে'ললৈ লালু প্ৰসাদ যাদৱ! পশুখাদ্য কেলেংকাৰীৰ অন্তিমটো গোচৰত ৰায় চি বি আইৰ আদালতৰ

ডিজিটেল ডেস্কঃ বিহাৰৰ বহু বিতৰ্কিত পশুখাদ্য কেলেংকাৰী গোচৰৰ ৰায় মঙ্গলবাৰে প্ৰদান কৰে চি বি আইৰ বিশেষ আদালতে। আৰজেডিৰ মুৰব্বী তথা বিহাৰৰ প্ৰাক্তন মুখ্যমন্ত্ৰী লালু প্ৰসাদ যাদৱক পঞ্চমটো পশুখাদ্য কেলেংকাৰীৰ গোচৰত দোষী সাব্যস্ত কৰা হৈছে৷ মঙলবাৰে ৰাতিপুৱা ন্যায়াধীশ চি কে শশীয়ে এই সন্দৰ্ভত ৰায়দান কৰে৷ ঝাৰখণ্ডৰ ৰাঁচীৰ এখন বিশেষ চিবিআই আদালতে তেওঁক দৰন্দা কোষাগাৰৰ পৰা ১৩৯.৩৫ কোটি টকা অবৈধভাৱে উলিওৱাৰ বাবে দোষী সাব্যস্ত কৰিছে। লালু প্ৰসাদ যাদৱ এতিয়া পাঁচটাকৈ গোচৰত দোষী সাব্যস্ত হৈছে৷ ৯৫0 কোটি টকাৰ পশুখাদ্য কেলেংকাৰীৰ গোচৰৰ সৈতে সম্পৰ্কিত আন চাৰিটা গোচৰতো দোষী সাব্যস্ত হৈছে লালু প্ৰসাদ যাদৱ৷ উল্লেখ্যে যে বহুচৰ্চিত পশুখাদ্য কেলেংকাৰী গোচৰত মুঠ ৯৯ জন অভিযুক্ত আছে। অৱশ্যে মঙ্গলবাৰে চি বি আইৰ এই বিশেষ আদালতে দোষী সাব্যস্ত হোৱা সকলৰ শাস্তি ঘোষণা কৰা নাই। আগন্তুক ২১ ফেব্ৰুৱাৰীত আটাইৰে শাস্তি ঘোষণা কৰিব আদালতে। ২০১৭ চনৰ ডিচেম্বৰৰ পৰা কাৰাগাৰত থকা ৭৩ বছৰীয়া নেতাগৰাকীয়ে ঝাৰখণ্ডৰ ৰাজেন্দ্ৰ ইনষ্টিটিউট অৱ মেডিকেল চাইন্সেছত তেওঁৰ কাৰাদণ্ডৰ সময় পাৰ কৰিছিল। অৱশ্যে, স্বাস্থ্যৰ অৱনতি হোৱাৰ পিছত তেওঁক যোৱা বছৰ জানুৱাৰীত দিল্লীলৈ নিয়া হৈছিল। পুনৰ জে'ল যাত্ৰাৰ পথ মুকলি হল বৰ্ষীয়ান নেতাগৰাকীৰ। ইফালে লালু যাদৱ পুনৰ এই গোচৰত দোষী সাব্যস্ত হোৱাৰ ফলত বিহাৰৰ বিভিন্ন প্ৰান্তত থকা তেওঁৰ সমৰ্থকসকল দুখত ভাগি পৰিছে। আৰু পঢ়কঃ ভাগ্যৰ পৰিৱৰ্তন! ৬০ বছৰত মডেল হ’ল দিন-হাজিৰা কৰা মজদুৰ