ডিজিটেল ডেস্কঃ মুছলিম মহিলাসকলে বিউটি পাৰ্লাৰলৈ যাব নালাগে। বিশেষকৈ য'ত পুৰুষ কৰ্মীয়ে কাম কৰে। এয়া একেবাৰে উচিৎ কথা নহয়। উত্তৰ প্ৰদেশৰ এজন ধৰ্মগুৰুয়ে পৰামৰ্শই প্ৰদান কৰিলে। মুফতি আছাদ কাছমী নামৰ এজন ইছলামিক ধৰ্মগুৰুয়ে কয় যে মুছলমান মহিলাসকলে মহিলাই কাম কৰা বিউটি পাৰ্লাৰলৈ যোৱাত কোনো বাধা নাই।
তেওঁ কেৱল পুৰুষ কৰ্মচাৰীসকলে কাম কৰা বিউটি পাৰ্লাৰলৈ যোৱাৰ বিষয়তহে আপত্তি কৰে। তেওঁৰ এনে পৰামৰ্শই স্বাভাৱিকতে বিতৰ্কৰ সৃষ্টি কৰিছে। উত্তৰ প্ৰদেশৰ কানপুৰত শেহতীয়াকৈ সংঘটিত এক ঘটনাৰ পিছতে মৌলৱীগৰাকীয়ে এনেদৰে মন্তব্য কৰে।
এজন লোকে বিউটি পাৰ্লাৰলৈ যোৱা তেওঁৰ পত্নীক ভিডিঅ' কলত দেখাৰ পিছতে পত্নীক বিবাহ বিচ্ছেদ দিছিল । লোকজনে চৌদি আৰৱত কাম কৰি আছিল। পত্নীক দেখি চেলিম নামৰ লোকজনে কৈছিল, " মোৰ সকলো আপত্তি স্বত্বেও তুমি বিউটি পাৰ্লাৰলৈ গ’লা?
আজিৰে পৰা মই তোমাক এই বিবাহৰ পৰা মুক্ত কৰিলো’’। ইয়াৰ পিছত, চেলিমে একেৰাহে তিনিবাৰ তালাক ঘোষণা কৰে আৰু ফোনটো কাটি দিয়ে। বাৰে বাৰে ফোন কৰা স্বত্বেও তেওঁ উত্তৰ দিয়া নাছিল। এনে ঘটনাৰ পিছতে উত্তৰ প্ৰদেশৰ ধৰ্মগুৰু জনে বিউটি পাৰ্লাৰৰ বিষয়ে এনে ধৰণৰ পৰামৰ্শ দিয়ে।
Continue Reading
