কাকপথাৰৰ ডিৰাক সোণজান গাঁৱত ভয়ংকৰ পথ দুৰ্ঘটনা; থিতাতে নিহত মহিলা

ডিজিটেল ডেস্ক: কাকপথাৰ ডিৰাক সোণজান গাঁৱত আজি বিয়লি প্ৰায় ৩ বজাত এক পথ দুৰ্ঘটনা সংঘটিত হয়৷ পথ দুৰ্ঘটনাটোত এগৰাকী মহিলাৰ মৃত্যু হয়৷ 

ঘটনাৰ বিৱৰণী মতে, সোণজান গাঁৱৰ মাজেৰে পাৰ হৈ যোৱা সদাব্যস্ত ১৫নং ৰাষ্ট্ৰীয় ঘাইপথটোৰ জেব্ৰা ক্ৰচিঙেদি বৰডিৰাক গোঁসাই গাঁৱৰ মহিলা অনি দত্ত মহন্ত(৪৩)পাৰ হৈছিল৷

এনেতে ডিৰাক গেটৰ দিশৰ পৰা কাকপথাৰৰ দিশে আহি থকা এখন মহেন্দ্ৰ এক্স ইউ ভি ৫০০ গাড়ীয়ে প্ৰচণ্ড জোৰে খুণ্ডা মাৰে মহিলগৰাকীক। ফলত মহিলাগৰাকী পথটোৰ বিপৰীত দিশে ছিটিকি পৰি থিতাতে নিহত হ’য়৷ 

আনহাতেদি দুৰ্ঘটনা সংঘটিত কৰা মহেন্দ্ৰ এক্স ইউ ভি ৫০০ গাড়ীখনসহ চালকে কাকপথাৰ আৰক্ষী থানাত আত্মসমৰ্পণ কৰে৷ গাড়ীখনৰ চালকৰ আসনত আছিল চিলাপথাৰ বৰমুৰিয়া গাঁৱৰ নন্দেশ্বৰ পেগু৷ 

শেহতীয়াকৈ দুৰ্ঘটনাস্থলীত বৰডুমচা আৰক্ষী উপস্থিত হৈ যাৱতীয় ব্যৱস্থা গ্ৰহণ কৰাৰ লগতে মৃতদেহটো মৰণোত্তৰ পৰীক্ষাৰ বাবে তিনিচুকীয়া চিকিৎসা মহাবিদ্যালয়লৈ প্ৰেৰণ কৰে৷

অনি দত্ত মহন্তৰ অকাল মৃত্যুত অঞ্চলজুৰি শোকৰ ছাঁ পৰিছে।