ডিজিটেল ডেস্কঃ পেৰিছ অলিম্পিকত ভাৰতৰ হৈ ভাৰোত্তোলনত অতি কম ব্যৱধানত পদক হেৰুৱালে মীৰাবাই চানুৱে। ইয়াৰ মাজতে মীৰাবাইয়ে কিয় পদক হেৰুৱালে সেই কথা বৰ্ণনা কৰিছে৷
৭ আগষ্টত অনুষ্ঠিত হোৱা পেৰিছ অলিম্পিকত মীৰাবাই চানুৱে ভাৰোত্তোলনত পদক লাভ কৰিব বুলি ভাৰতৰ ১৪০ কোটি জনসাধাৰণে আশা কৰি আছিল কিন্তু তেওঁ বিফল হ’ল আৰু পদক লাভ কৰিবলৈ সক্ষম নহ’ল। মীৰাবাইয়ে ক্লীন এণ্ড জাৰ্কৰ শেষ প্ৰচেষ্টাত ১১৪ কিলোগ্ৰাম ওজন তুলিব নোৱাৰিলে আৰু এইদৰে পদক লাভৰ পৰা বঞ্চিত হয়।
৮ আগষ্ট অৰ্থাৎ আজি মীৰাবাইৰ জন্মদিন, এনে পৰিস্থিতিত তেওঁ ইতিহাস ৰচাৰ সুযোগ পাইছিল। প্ৰতিযোগিতা শেষ হোৱাৰ পাছত মীৰাবাইয়ে কয় যে কালি তেওঁৰ মাহেকীয়াৰ তৃতীয় দিন আছিল, গতিকে তেওঁৰ বাবে প্ৰতিযোগিতাখন যথেষ্ট কষ্টকৰ আছিল। তেওঁ বহুত দুৰ্বল অনুভৱ কৰিছিল।
মীৰাবাই চানুৱে কয়- আজিৰ প্ৰদৰ্শনত মই বহুত সুখী। সকলোৱে জানে মই বহুত আঘাতৰ সন্মুখীন হৈ আহিছো। ৰিঅ'(২০১৬ অলিম্পিক)ত মোৰ লগত কি হৈছিল সেই কথা সকলোৱে জানে। তাত মই মোৰ পদকটো হাতৰ পৰা হেৰুৱাইছিলোঁ। প্ৰতিজন খেলুৱৈৰ লগত এনেকুৱাই হয়।
মীৰাবাইয়ে উল্লেখ কৰে যে, ‘তাৰ পিছত মই বিশ্ব চেম্পিয়ন হ’লোঁ৷ টকিঅ’ অলিম্পিকত ভাৰতৰ হৈ ৰূপৰ পদক লাভ কৰিছিলোঁ। এইবাৰো মই চেষ্টা কৰিছিলো, কিন্তু সকলোৱে জানে আঘাতৰ বাবে এছিয়ান গেমছত মোৰ অৱস্থা কেনে আছিল। ইয়াৰ পিছত মই ৪-৫ মাহৰ বাবে ৰিহাবলৈ গ’লোঁ। পেৰিছ অলিম্পিকত সময় আছিল অতি কম, মই আপ্ৰাণ চেষ্টা কৰিছিলো কিন্তু সফল হ’ব নোৱাৰিলো।
৪৯ কেজি ওজনৰ শাখাত প্ৰতিদ্বন্দ্বিতা কৰা মীৰাবাইয়ে স্নেচ ৰাউণ্ডত উৎকৃষ্ট প্ৰচেষ্টা চলাইছিল আৰু এই ৰাউণ্ডৰ পিছত তেওঁ তৃতীয় স্থান লাভ কৰিছিল। এই ৰাউণ্ডত তেওঁ ৮৮ কেজিৰ সৰ্বোত্তম ওজন তুলিছিল। ইয়াৰ পিছত ক্লিন এণ্ড জাৰ্কত তেওঁৰ বিফলতাৰ সন্মুখীন হ’ল। মিৰাবাই চানুৱে স্নেচত ৮৮ কেজি আৰু ক্লিন এণ্ড জাৰ্কত ১১১ কেজি ওজন তুলি মুঠ ১৯৯ কিলোগ্ৰাম ওজন তুলিলে। মাত্ৰ এক কিলোগ্ৰামৰ বাবেই তেওঁ পদক লাভৰ পৰা বঞ্চিত হয়।
স্বৰ্ণ পদকৰ বাবে শক্তিশালী প্ৰতিদ্বন্দ্বী চীনৰ বৰ্তমানৰ অলিম্পিক চেম্পিয়ন হৌ জিহুইয়ে ক্লিন এণ্ড জাৰ্কত অলিম্পিক অভিলেখ গঢ়ি প্ৰথম স্থান দখল কৰে। তেওঁ মুঠ ২০৬ (স্নেচ ৮৯, ক্লিন এণ্ড জাৰ্ক ১১৭) কিলোগ্ৰাম তুলিছিল। ৰোমানিয়াৰ ভেলেন্টিনা কেম্বেই ২০৬ (৯৩ আৰু ১১২) কিলোগ্ৰাম ওজনেৰে ৰূপৰ পদক আৰু থাইলেণ্ডৰ সুৰোডচানা খাম্বোৱে ২০০ (৮৮ আৰু ১১২) কিলোগ্ৰাম ওজনেৰে ব্ৰঞ্জৰ পদক লাভ কৰাত সফল হয়।
ক্লিন এণ্ড জাৰ্কৰ প্ৰথম প্ৰচেষ্টাত মীৰাবাইয়ে ১১১ কিলোগ্ৰাম ওজন তুলিবলৈ চেষ্টা কৰিছিল, কিন্তু বিফল হৈছিল। ইয়াৰ পিছত তেওঁ লগে লগে দ্বিতীয় প্ৰচেষ্টাত এই ১১১ কিলোগ্ৰাম ওজন তুলি লৈ পদক দখল কৰে। ইয়াৰ পিছত তেওঁ ক্লিন এণ্ড জাৰ্কৰ তৃতীয় আৰু শেষ প্ৰচেষ্টাত ১১৪ কিলোগ্ৰাম ওজন তুলিবলৈ বাছি লৈছিল। কিন্তু তেওঁ সফলতাৰে তুলিব নোৱাৰিলে আৰু চতুৰ্থ স্থান দখল কৰি পেৰিছ অলিম্পিকৰ পৰা বাহিৰ হ’ল।
Continue Reading
