ডিজিটেল ডেস্ক: CJP প্ৰতিবাদৰ সময়ত প্ৰধানমন্ত্ৰী নৰেন্দ্ৰ মোদী আৰু তেওঁৰ প্ৰয়াত মাতৃৰ বিৰুদ্ধে কৰা অশালীন মন্তব্যক কেন্দ্ৰ কৰি তীব্ৰ সমালোচনাৰ সন্মুখীন হোৱা ৰুচিকা সিঙে অৱশেষত ভিডিঅ’ বাৰ্তাৰ জৰিয়তে দেশবাসীৰ ওচৰত ক্ষমা বিচাৰিছে।
ৰুচিকাই নিজৰ ভুল স্বীকাৰ কৰি কয় যে তেওঁৰ বয়স মাত্ৰ ১৫ বছৰ আৰু আৱেগৰ বশৱৰ্তী হৈ তেওঁ অতি অশ্লীল ভাষা ব্যৱহাৰ কৰিছিল। তেওঁ গভীৰ অনুশোচনা প্ৰকাশ কৰি কয় যে এই ঘটনাৰ ইমান গুৰুতৰ পৰিণতি হ’ব বুলি তেওঁ কেতিয়াও কল্পনা কৰা নাছিল।
ক্ষমাপ্ৰাৰ্থনাৰ সময়ত ৰুচিকাই প্ৰতিশ্ৰুতি দিয়ে যে এয়াই তেওঁৰ ‘প্ৰথম আৰু শেষ ভুল’। তেওঁ দেশবাসীৰ ওচৰত ক্ষমা বিচাৰি সকলোকে তেওঁক ক্ষমা কৰি দিবলৈ অনুৰোধ জনায়। আৱেগিক কণ্ঠেৰে তেওঁ কয়, ‘‘মই ইমানেই লাজ পাইছোঁ যে কাৰো চকুলেও চাব নোৱাৰা হলোঁ।’’
তেওঁৰ এই ক্ষমাপ্ৰাৰ্থনাৰ ভিডিঅ’ ইতিমধ্যে ছ’চিয়েল মিডিয়াত ব্যাপক চৰ্চাৰ বিষয় হৈ পৰিছে। বহু ব্যৱহাৰকাৰীয়ে তেওঁৰ অনুশোচনাক ইতিবাচকভাৱে গ্ৰহণ কৰাৰ বিপৰীতে আন একাংশই মত প্ৰকাশ কৰিছে যে ঘটনাটোৰ আইনী প্ৰক্ৰিয়া নিজস্ব গতিত আগবাঢ়িব লাগে।
উল্লেখযোগ্য যে, গোচৰটোৰ তদন্ত অব্যাহত থকাৰ লগতে এই ঘটনাক কেন্দ্ৰ কৰি ৰাজনৈতিক বিতৰ্কও এতিয়াও অব্যাহত আছে।
Continue Reading
