সাৱধান! অনলাইন প্ৰেম কৰিছে নেকি, হ’ব পাৰে বৃহৎ ক্ষতি...

ডিজিটেল ডেস্ক: প্ৰেম এক স্বৰ্গীয় অনুভূতি। অন্তৰৰ নিভৃত কোণৰ পৰা কেৱল অনুভৱ কৰিব পৰা এক অনুভূতি নামেই হ’ল প্ৰেম। প্ৰেম আছে বাবেই সৃষ্টি আছে, প্ৰেমৰ বাবেই বিশ্বখন চলি আছে৷ প্ৰেমক কোনো ভাষাৰে প্ৰকাশ কৰাৰো প্ৰয়োজন নাই, মৌনতাই প্ৰকাশ কৰিব পাৰে হৃদয়ৰ হাজাৰটা গোপন কথা, দুচকুৰ নীলাভ চাৱনীয়ে প্ৰকাশ কৰিব পাৰে গভীৰ ভালপোৱা অনুভূতিক৷

অৱশ্যে বিংশ শতিকা আৰু ৮০/৯০ দশকৰ প্ৰেমৰ মাজত আকাশ-পাতাল পাৰ্থক্য পৰিলক্ষিত হয়, সেইয়া লাগিলে ভালপোৱা প্ৰকাশভংগীয়ে হওঁক বা প্ৰেমৰ গভীৰতাৰ ক্ষেত্ৰতে হওঁক৷ এটা সময় আছিল, যেতিয়া প্ৰেমিক যুগলে যোগা-যোগৰ মাধ্যম হিচাপে কেৱল এখন চিঠি ব্যৱহাৰ কৰিছিল, সেই সময়ত প্ৰেমিক-প্ৰেমিকাই এখন চিঠিৰ অপেক্ষাত ডাকোৱাল জনলৈ ৰৈ থকা যি মাদকতা সেইয়া সকলোতকৈ সুকীয়া৷ সময় সলনি হ’ল, সলনি হ’ল প্ৰেম কৰাৰ প্ৰকাশভংগীও৷ বৰ্তমান সময় ইণ্টাৰনেটৰ যুগ, ছচি’য়েল মিডিয়াৰ বিভিন্ন প্লেটফৰ্মৰ যোগেদি বহু যুৱক-যুৱতীয়ে গঢ়ি তোলে প্ৰথম প্ৰেমৰ প্ৰকাশ৷ আনকি অনলাইন প্ৰেম যোগেদিয়েই বহুতো প্ৰেমিক-প্ৰেমিকাই দেখা সাক্ষাত নোহোৱাকৈ বিয়া পৰ্যন্ত ঠিক কৰি পেলাই, ভালপোৱাৰ প্ৰকাশভংগী সেই মবাইল ফন’টোৱে একমাত্ৰ সাৰথি৷ মান-অভিমান, খং ৰাগ, হাঁহি-কান্দোন সকলোবোৰৰ সাক্ষী হৈ থাকে এই মবাইল ফন’টোৱে৷

কিন্তু এইবাৰ অনলাইন প্ৰেমৰ ক্ষেত্ৰত প্ৰকাশ পোৱা এটা সমীক্ষাই সকলোৰে মাজত চৰ্চা লাভ কৰিছে৷ আমেৰিকাৰ যুক্তৰাষ্ট্ৰৰ মেৰেজ ফাউণ্ডেচনৰ এটা অধ্যয়নত প্ৰকাশ পাইছে যে, যিসকল লোকে অনলাইন প্ৰেম কৰি বিবাহ-পাশত আবদ্ধ হৈছে তেওঁলোকৰ বিবাহ বিচ্ছেদ হোৱাৰ সম্ভাৱনা অধিক৷ সমীক্ষাটোত প্ৰকাশ পাইছে যে, যি সকললোকে প্ৰেম কৰি বিবাহ-পাশত আবদ্ধ হৈছে তেওঁলোকৰ বিবাহ বিচ্ছেদৰ আশংকা ১৭% লৈ বৃদ্ধি পোৱাৰ বিপৰীতে যি সকল লোকে ঘৰৰ পৰা চোৱা পাত্ৰ-পাত্ৰীৰ লগত বিবাহ-পাশত আবদ্ধ হ’য় তেওঁলোকৰ বিবাহ বিচ্ছেদৰ আশংকা মাত্ৰ ২%৷ সমীক্ষাটোত মুঠ ২০০০ জন দম্পতীক লৈ কৰা হৈছিল আৰু তেওঁলোকৰ বয়স আছিল ৩০ বছৰৰ ওচৰত৷ তেওঁলোকৰ বেছিভাগেই অনলাইন এপৰ যোগেদি লগ পাইছিল আৰু কথা-বতৰা হৈছিল তাৰ পাছত তেওঁলোকৰ বিবাহ বিচ্ছেদ হৈছে৷ অনলাইন মাধ্যমৰ যোগেদি ভালপোৱাক যদিও একেবাৰে ওচৰ চপাই আনিলে তথাপিও কিন্তু ভালপোৱাৰ পৰিসৰৰ ক্ষেত্ৰত এতিয়াও কৰবাত যেন সুৰুঙা ৰৈ যায় বুলি সমীক্ষাটোত প্ৰকাশ পাইছে৷