সামাজিক বৈষম্য! দলিত যুৱকক অপহৰণ কৰি নিৰ্যাতন, বলপূৰ্বক পান কৰালে প্ৰস্ৰাৱ

ডিজিটেল ডেস্ক : দেশত অব্যাহত আছে দলিতৰ ওপৰত অত্যাচাৰ। দেশৰ গণতান্ত্ৰিক প্ৰমূল্য আৰু সাংবিধানিক নিৰ্দেশনাক অংগুষ্ঠ প্ৰদৰ্শন কৰি বাৰম্বাৰ দেশৰে এচাম জনতাক দ্বিতীয়-তৃতীয় শ্ৰেণীৰ নাগৰিক হিচাপে গণ্য কৰাৰ প্ৰৱণতা একাংশ লোকৰ মাজত অব্যাহত আছে। এচাম তথাকথিত উচ্চ বৰ্ণৰ লোকৰ অহংকাৰ আৰু উচ্চাত্মিকাৰ বলি হৈছে দেশৰ এইসকল নিসহায়, অৱলম্বনহীন নাগৰিক। দেশৰ উত্তৰ প্ৰান্তত দলিত লোকসকল প্ৰায়েই নিৰ্যাতন, নিৰ্মমতাৰ বলি হৈ অহাৰ ঘটনা সংঘটিত হোৱাৰ খবৰে সংবাদ শিৰোনাম দখল কৰি আহিছে। এইবাৰ পুনৰ দলিত লোকৰ নিৰ্যাতনৰ ঘটনা সংঘটিত হৈছে দেশত। এগৰাকী ২৫বছৰীয়া দলিত যুৱকক অপহৰণ কৰাৰ পাছত নানা নিৰ্যাতন চলোৱাৰ লগতে বলপূৰ্বকভাৱে মূত্ৰপান কৰোঁৱাৰ ঘটনা সংঘটিত হৈছে ৰাজস্থানৰ চুৰু জিলাত। আঠজন লোকে এই নাৰকীয় কাণ্ড সংঘটিত কৰা বুলি অভিযোগ উঠিছে। দেওবাৰে আৰক্ষীয়ে এই বিষয়ে প্ৰকাশ কৰে আৰু কয় যে ইতিমধ্যে দুজন অভিযুক্তক গ্ৰেপ্তাৰ কৰা হৈছে। ৰুখাচৰ গাঁৱৰ বাসিন্দা ৰাকেশ মেঘৱাল নামৰ যুৱকজনে আৰক্ষীক দাখিল কৰা অভিযোগ অনুসৰি ২৭ জানুৱাৰীত অভিযুক্ত লোককেইজনে তেওঁক ঘৰৰ পৰাই অপহৰণ কৰি নিয়ে।নিশা প্ৰায় ১১বজাত এখন এছইউভি গাড়ীত অভিযুক্ত লোককেইজনে যুৱকজনক অপহৰণ কৰি নিয়া বুলি অভিযোগ কৰিছে যুৱকজনে। অভিযুক্ত লোককেইজনে যুৱকজনক বটলত প্ৰস্ৰাৱ কৰি পান কৰিবলৈ দিয়াৰ লগতে নানা অপমানসূচক গালি গালাজ কৰিছিল। ‘দলিতসকলক শিক্ষা দিব লাগে’ বুলিও হুংকাৰ দিছিল যুৱককেইজনে। তদুপৰি তথাকথিত প্ৰতিপত্তিশালী জাতৰ লোকসকলে তেওঁক মাৰধৰো কৰিছিল। আৰক্ষীয়ে দুজন লোকক গ্ৰেপ্তাৰ কৰি তদন্ত প্ৰক্ৰিয়া চলাই আছে। গ্ৰেপ্তাৰ কৰা লোক দুজন উমেশ আৰু বিৰবল বুলি আৰক্ষীয়ে প্ৰকাশ কৰিছে। তদুপৰি আনকেইজন অভিযুক্ত অক্ষয়, ৰাজেশ, ৰাকেশ, তাৰাচান্দ, বিদাদিচান্দ আৰু দিনেশৰ সন্ধান চলাই আছে।