সাময়িকভাৱে স্থগিত ইউজিচি নেট পৰীক্ষা, কেতিয়া অনুষ্ঠিত হ’ব পৰীক্ষা?

ডিজিটেল ডেস্কঃ সাময়িকভাৱে পিছুৱাই দিয়া হৈছে ইউজিচি নেট পৰীক্ষা। নেট পৰীক্ষা অনুষ্ঠিত কৰাৰ দায়িত্বত থকা নেচনেল টেষ্টিং এজেঞ্চীয়ে এই কথা নিশ্চিত কৰিছে। পূৰ্বৰ সময়সূচী অনুসৰি ২০২০-২১ বৰ্ষৰ ইউজিচি পৰীক্ষা ৬ৰ পৰা ৮ অক্টোবৰলৈকে অনুষ্ঠিত হোৱাৰ কথা আছিল।

শেহতীয়াকৈ পূৰ্বৰ সময়সূচী সাল-সলনি কৰি ১৭ৰ পৰা২৫ অক্টোবৰলৈকে সৰ্বভাৰতীয় নেট পৰীক্ষা অনুষ্ঠিত কৰা সিদ্ধান্ত লৈছে সংস্থাটোৱে, অৱশ্যে পৰীক্ষাৰ বিস্তৃত সূচী পৰৱৰ্তী সময়তহে প্ৰকাশ কৰা হ’ব। উল্লেখ্য যে, নেচনেল টেষ্টিং এজেঞ্চীয়ে এই সম্পৰ্কত জাননী জাৰি কৰি কয় যে,

যিহেতু আন কেইবাটাও গুৰুত্বপূৰ্ণ প্ৰৱেশ পৰীক্ষা ইউজিচি নেটৰ লগত একে দিনতে হোৱাৰ বাবে প্ৰাৰ্থীসকল যথেষ্ট অসুবিধাৰ সন্মুখীন হৈছিল আৰু সেই সমস্যা দূৰ কৰিবৰ বাবেই সংস্থাই এই সিদ্ধান্ত ল’ব লগা হ’ল বুলি জাননীত উল্লেখ কৰিছে, লগতে প্ৰাৰ্থীসকলেও ১০ অক্টোবৰৰ পাছতহে প্ৰাৰ্থীসকলে নেটৰ প্ৰৱেশ-পত্ৰ লাভ কৰিব বুলি জানিবলৈ দিছে। প্ৰাৰ্থীসকলৰ পৰীক্ষাৰ প্ৰৱেশ-পত্ৰৰ লগতে পৰীক্ষা সমন্ধীয় গুৰুত্বপূৰ্ণ তথ্য-পাতি ইউজিচি অফিচিয়েল ৱেবছাইট ‘ugcnet.nta.nic.in’ত উপলদ্ধ হ'ব বুলি সংস্থাটোৱে জানিবলৈ দিছে।