ডিজিটেল ডেস্ক: অসমত পশ্চিমবংগ আৰক্ষীৰ দাদাগিৰি! গুৱাহাটীত অনুষ্ঠিত তৃণমূল কংগ্ৰেছৰ অনুষ্ঠানত সাংবাদিকক অপদস্থ কৰিলে পশ্চিমবংগ আৰক্ষীয়ে৷ ‘প্ৰাগ নিউজ’ৰ ভিডিঅ’ সাংবাদিক ৰাজু বৰাক বংগৰ সাংসদ অভিষেক বেনাৰ্জীৰ দেহৰক্ষীয়ে কৰিলে অপদস্থ৷ উল্লেখ্য যে, আগন্তুক পঞ্চায়ত নিৰ্বাচনত যুঁজাৰ পৰিকল্পনাৰে অসমত কেইবাটাও কাৰ্যসূচীৰে গুৱাহাটীলৈ আহিছিল অভিষেক বেনাৰ্জী৷
অনুষ্ঠান চলি থকাৰ মাজতে জ্যেষ্ঠ ভিডিঅ’ সাংবাদিকগৰাকীক অকথ্য গালি-গালাজ পাৰি গতিয়াই দিলে অনুষ্ঠানৰ পৰা৷ তাৰ পাছতে প্ৰতিবাদ স্বৰূপে সকলো সাংবাদিকে বন্ধ কৰিলে অনুষ্ঠানটোৰ ক’ভাৰেজ।
অনুষ্ঠানত মহিলা সাংবাদিককো অপদস্থ কৰাৰ অভিযোগ উত্থাপিত হৈছে বংগ আৰক্ষীৰ বিৰুদ্ধে৷
ইপিনে এই ঘটনাৰ পাছতে বংগ আৰক্ষীৰ বিৰুদ্ধে তীব্ৰ প্ৰতিক্ৰিয়া প্ৰকাশ কৰি TMCক গণতান্ত্ৰিক প্ৰমূল্যহীন দল আখ্যা দিয়ে শিৱসাগৰৰ বিধায়ক অখিল গগৈয়ে৷ ‘অসমত নৱগঠিত দলটোৰ এনে কাৰ্য দুৰ্ভাগ্যজনক’ বুলি মত প্ৰকাশ বিধায়কগৰাকীৰ৷ সাংবাদিকক অপদস্থ কৰা এই ঘটনাক লৈ গুৱাহাটী প্ৰেছ ক্লাবেও তীব্ৰ গৰিহণা প্ৰকাশ কৰে৷
উল্লেখ্য যে অসমৰ সাংবাদিকক দুঃব্যৱহাৰ কৰাৰ পাছতো সাংবাদিকৰ ওপৰতহে খৰ্গহস্ত হৈ ওলোটাই দোষিলে TMC নেতা অভিষেক বেনাৰ্জীয়ে৷ ঘটনাক লৈ ক্ষমা বিচাৰিলে যদিও বেনাৰ্জীক সাংবাদিকৰ সৈতে বাক-বিতণ্ডাত লিপ্ত হোৱা দেখা গ’ল৷
Continue Reading
