ডিজিটেল ডেস্ক: ভাৰতীয় এথলীট সীমা কুমাৰীয়ে ২৪ ছেপ্টেম্বৰ, বৃহস্পতিবাৰে এছিয়ান গেমছৰ ১০,০০০ মিটাৰ দৌৰ ইভেণ্টত ব্ৰঞ্জৰ পদক লাভ কৰি ইতিহাস ৰচনা কৰে। মিজুহো পাৰ্ক এথলেটিক ষ্টেডিয়ামত মহিলাসকলৰ ১০,০০০ মিটাৰ দৌৰৰ ফাইনেল অনুষ্ঠিত হয়, য'ত সীমা কুমাৰীয়ে ৩২:৫০.০৫ ছেকেণ্ড সময় লৈ তৃতীয় স্থান দখল কৰে।
ইয়াৰ পূৰ্বে ২০১০ চনত ভাৰতৰ প্ৰীজা শ্ৰীধৰণে এই ইভেণ্টত সোণৰ পদক লাভ কৰিছিল, আনহাতে কবিতা ৰাউতে ৰূপৰ পদক দখল কৰিছিল। সীমা এই দৌৰত পদক জয় কৰা তৃতীয়গৰাকী ভাৰতীয় খেলুৱৈ হৈ পৰিল।
প্ৰতিযোগিতাখনত বাহৰেইনৰ ভিনফ্ৰেড য়াভিয়ে সোণৰ পদক নিজৰ নামত কৰে। তেওঁ ৩২:৩৯.১৮ ছেকেণ্ডত দৌৰ সমাপ্ত কৰে। ইয়াৰ লগতে জাপানৰ নজমি তানাকায়ে ৩২:৪১.৫৪ ছেকেণ্ডত দৌৰ সমাপ্ত কৰি ৰূপৰ পদক দখল কৰে।
সীমাৰ ফাইনেলৰ আৰম্ভণি যথেষ্ট ভাল আছিল। প্ৰথম ২০০০ মিটাৰত তেওঁক আটাইতকৈ আগত দেখা গৈছিল। ইয়ালৈকে আহিবলৈ তেওঁ মাত্ৰ ৬:৩৬.১৩ ছেকেণ্ড সময় লৈছিল। কিন্তু ইয়াৰ পিছত তেওঁ নিজকে শীৰ্ষস্থানত ধৰি ৰাখিব নোৱাৰিলে। এটা সময়ত তেওঁ চতুৰ্থ স্থানলৈ নামি গৈছিল, যিটো দেখি ধাৰণা হৈছিল যে ভাৰতে কোনো পদক নাপাব। কিন্তু শেষৰ ১০০০ মিটাৰত তেওঁ আকৰ্ষণীয় প্ৰত্যাৱৰ্তন কৰে আৰু শীৰ্ষ-৩ লৈ উভতি আহে। এইদৰে তেওঁ পদক দখল কৰে।
এছিয়ান গেমছৰ পদক তালিকাত ভাৰত ১৭ টা পদকেৰে ১৫ সংখ্যক স্থানত আছে। সীমা কুমাৰী ভাৰতৰ বাবে ১৬ সংখ্যক পদক জয় কৰা খেলুৱৈ আছিল। ইয়াৰ পিছত ৪×৪০০ মিটাৰ ৰিলে দৌৰৰ দলটোৱে ৰূপৰ পদক জয় কৰে, যিটো ভাৰতৰ বাবে ১৭ সংখ্যক পদক আছিল। এতিয়ালৈকে ভাৰতলৈ মাত্ৰ এটা সোণৰ পদকহে আহিছে। এই সোণৰ পদকটো ভাৰতৰ মহিলা ক্ৰিকেট দলটোৱে লাভ কৰিছে। এতিয়া অপেক্ষা দ্বিতীয়টো সোণৰ পদকলৈ।
Continue Reading
