ডিজিটেল ডেস্কঃ অভিনয় নহয়, সেনাবাহিনীত যোগদান কৰিবলৈ আগ্ৰহী ৰবি কিষাণৰ কন্যা ঈশিতা। জনপ্ৰিয় ভোজপুৰী অভিনেতাগৰাকীয়ে নিজেই এই কথা ব্যক্ত কৰিছে। স্মৰ্তব্য যে, অলপতে মোদী চৰকাৰে ‘অগ্নিপথ’ প্ৰকল্পৰ কথা ঘোষণা কৰিছিল। সেনা, নৌসেনা আৰু বায়ুসেনাত যোগদান কৰিবলৈ ইচ্ছুক যুৱক-যুৱতীসকলে এই প্ৰকল্পৰ সুবিধা ল’ব পাৰে বুলি প্ৰকাশ পাইছে। অহা ৪ বছৰ এই প্ৰকল্পৰ জৰিয়তে সেনাবাহিনীত নিযুক্তি দিয়া হ’ব দেশৰ যুৱক-যুৱতীসকলক। এই প্ৰকল্পৰ অধীনতে সেনাবাহিনীত যোগদান কৰিব বিচাৰিছে ৰবি কিষাণৰ কন্যা ঈশিতা শুক্লাই।
ভোজপুৰী অভিনেতা তথা ভাৰতীয় জনতা পাৰ্টীৰ সদস্য গৰাকীয়ে ছ’চিয়েল মিডিয়াত এখন ছবি শ্বেয়াৰ কৰি লিখিছে, ‘মোৰ কন্যা ঈশিতা শুক্লাই আজি পুৱা মোক কৈছিল-দেউতা, মই অগ্নিপথ প্ৰজেক্টৰ জৰিয়তে সেনাবাহিনীত যোগদান কৰিব বিচাৰো। মই তেওঁক আগুৱাই যাবলৈ ক'লোঁ।’ প্ৰসংগক্ৰমে অভিনেতাজনৰ কন্যা ঈশিতাই বহু আগতেই এনচিচিত যোগদান কৰিছে।
ইফালে, অভিনেতা ৰবি কিষাণ আৰু তেওঁৰ পত্নী প্ৰীতিৰ ৪টাকৈ সন্তান আছে। তেওঁৰ ৩ গৰাকী কন্যা ক্ৰমে ৰিভা, টানিস্ক আৰু ঈশিতা। ল’ৰা সন্তানৰ নাম সাক্ষণ। ইফালে ৰবি কিষাণৰ আনগৰাকী কন্যা ৰীভাই ইতিমধ্যে বলীউডত ভৰি দিয়া বুলি খবৰ ওলাইছে।
Continue Reading
