সেনাপ্ৰধান বিপিন ৰাৱটৰ হেলিকপ্টাৰ দুৰ্ঘটনাগ্ৰস্ত, ১১জন নিহত, সন্ধান নাই ৰাৱটৰ

ডিজিটেল ডেস্ক : ভাৰতৰ চীফ অব ডিফেন্স ষ্টাফ জেনেৰেল বিপিন ৰাৱটৰ হেলিকপ্টাৰ দুৰ্ঘটনাগ্ৰস্ত। পত্নীসহ হেলিকপ্টাৰখনৰ আৰোহী হৈছিল ৰাৱট। তামিলনাডুৰ কুন্নুৰত বুধবাৰে এই ভয়ংকৰ দুৰ্ঘটনা সংঘটিত হয়। পাহাৰীয়া এটা অঞ্চলত দুৰ্ঘটনাগ্ৰস্ত হোৱা হেলিকপ্টাৰখন নিমিষতে জুয়ে আগুৰি ধৰে।

দুৰ্ঘটনাস্থলীৰ পৰা এতিয়ালৈ ১১টা মৃতদেহ উদ্ধাৰ কৰা হৈছে। উদ্ধাৰ হৈছে তিনিজন গুৰুতৰভাৱে আহত লোককো। হেলিকপ্টাৰখনৰ সেনাপ্ৰধান ৰাৱট তেওঁৰ পত্নীসহ মুঠ চৈধ্যজন লোক আছিল বুলি সদৰী কৰা হৈছে। বাকী লোকসকলৰ সন্ধানত তীব্ৰ অভিযান চলাই থকা হৈছে। এতিয়ালৈ সেনাপ্ৰধান ৰাৱট আৰু তেওঁৰ পত্নী সম্পৰ্কত কোনো তথ্য লাভ কৰিবলৈ সক্ষম হোৱা নাই। একাংশ সংবাদ মাধ্যমত প্ৰকাশ পোৱা মতে ৰাৱটক অগ্নিদগ্ধ হৈ আহত অৱস্থাত উদ্ধাৰ কৰা হৈছে। কিন্তু তথ্য কিমান নিশ্চিত সেয়া জানিব পৰা হোৱা নাই।

হেলিকপ্টাৰখন ছুলুৰ বায়ুসেনা ঘাটীৰ পৰা ৱেলিংটনত থকা ডিফেন্স ছাৰ্ভিচেজ কলেজলৈ গৈ আছিল। নাঞ্জাপাঞ্চাথিৰামত ভয়ংকৰ দুৰ্ঘটনাত পতিত হয় হেলিকপ্টাৰখন। প্ৰচুৰ কুঁৱলীৰ বাবেই এই দুৰ্ঘটনা সংঘটিত হোৱাৰ আশংকা কৰা হৈছে। ইতিমধ্যে এই ঘটনাৰ তদন্তৰ নিৰ্দেশ দিয়া হৈছে।