শ্ৰেষ্ঠ টিকাকৰণকাৰীৰ বঁটাৰ বাবে নিৰ্বাচিত দুগৰাকী নাৰ্ছ

ডিজিটেল ডেস্ক: ৰাষ্ট্ৰীয় ক’ভিড-১৯ টিকাকৰণ কাৰ্যসূচীৰ অংশ হিচাপে দুগৰাকী নাৰ্ছক প্ৰদান কৰা হয় সন্মান৷ কেৰালাৰ দুগৰাকী নাৰ্ছক শ্ৰেষ্ঠ টিকাকৰণকাৰীৰ বঁটাৰ বাবে নিৰ্বাচিত কৰা হৈছে৷ ৮ মাৰ্চ আন্তঃৰাষ্ট্ৰীয় মহিলা দিৱস উদযাপনৰ দিনটোত দুয়োকে দিল্লীত এই সন্মান প্ৰদান কৰা হ’ব। কেৰালাৰ স্বাস্থ্যমন্ত্ৰী বীনা জৰ্জে স্বাস্থ্যসেৱা কৰ্মীসকলক অভিনন্দন জনাই কয়, ‘তিৰুৱন্তপুৰমৰ জেনেৰেল হাস্পতালৰ গ্ৰেড ৱান নাৰ্ছিং বিষয়া প্ৰিয়া আৰু কান্নুৰ জিলাৰ পায়ান্নুৰ তালুক চিকিৎসালয়ৰ গ্ৰেড ৱান জুনিয়ৰ পাব্লিক হেলথ নাৰ্ছ(জেপিএইচএন)ক কেৰালাৰ শ্ৰেষ্ঠ টিকাকৰণকাৰী হিচাপে নিৰ্বাচিত কৰা হৈছে।’ চিকিৎসালয়সমূহত টিকাকৰণ কাৰ্যসূচী সম্পন্ন কৰাত সহায় কৰা সকলো স্বাস্থ্যকৰ্মীকে জৰ্জে ধন্যবাদ জনায়৷ তেওঁ কয় যে, ‘ৰাজ্যখনত ক’ভিড-১৯ৰ তৃতীয় ঢৌ অতিক্ৰম কৰাত টিকাকৰণে এক গুৰুত্বপূৰ্ণ ভূমিকা পালন কৰিছে।’ তেওঁ লগতে কয় যে, ১৮ বছৰৰ অধিক বয়সৰ ১০০ শতাংশ লোকক ক’ভিড-১৯ টিকাকৰণৰ প্ৰথমপালি প্ৰদান কৰা হৈছে, তেওঁলোকৰ ৮৬ শতাংশকো দ্বিতীয়পালি প্ৰদান কৰা হৈছে। লগতে, ১৫ৰ পৰা ১৭ বছৰ বয়সৰ ৭৭ শতাংশ শিশুক ভেকচিনৰ প্ৰথমপালি প্ৰদান কৰা হৈছে। আনহাতে, তেওঁলোকৰ ৩৬শতাংশই ৰাজ্যখনত দ্বিতীয় পালি লাভ কৰিছে। ‘কেৰালাই সকলোৰে বাবে টিকাকৰণ নিশ্চিত কৰিবলৈ বিশেষ টিকাকৰণ অভিযান আৰম্ভ কৰিছে। আমাৰ টিকাকৰণ কাৰ্যসূচীৰ সফলতাৰ আঁৰত স্বাস্থ্যকৰ্মীসকল আছে’ বুলি জৰ্জে সংবাদ মাধ্যমৰ আগত এই মন্তব্য কৰিছে৷