বিজেপিৰে একত্ৰীকৰণ আপৰ পদত্যাগী ৭ সাংসদক

ডিজিটেল ডেস্ক: ৰাজ্য সভাৰ অধ্যক্ষ তথা উপ-ৰাষ্ট্ৰপতি চি পি ৰাধাকৃষ্ণণে সোমবাৰে আম আদমি পার্টি (আপ)ৰ সাতজন সদ্যপদত্যাগী সাংসদৰ বিজেপিৰে একত্ৰীকৰণত সন্মতি প্ৰদান কৰে। ইয়াৰ লগে লগেই সংসদৰ উচ্চ সদন ৰাজ্য সভাত বিজেপিৰ সাংসদৰ সংখ্যা ১১৩জনলৈ বৃদ্ধি পালে। ইফালে আপৰ সাংসদৰ সংখ্যা ১০জনৰ পৰা ৩জনলৈ হ্রাস পালে। 

ইফালে বিজেপি নেতৃত্বাধীন ৰাষ্ট্ৰীয় গণতান্ত্রিক মৰ্চা (এন ডি এ)ৰ আসনৰ সংখ্যা পূৰ্বৰ ১৪১ খনৰ পৰা বৰ্তমান ১৪৮খনলৈ বৃদ্ধি পালে। দিল্লীৰ প্ৰাক্তন মুখ্যমন্ত্রী অৰৱিন্দ কেজৰিৱাল নেতৃত্বাধীন আপলৈ বিপর্যয় কঢ়িয়াই সোমবাৰে ৰাজ্য সভাৰ অধ্যক্ষ ৰাধাকৃষ্ণণে আপৰ পদত্যাগী সাংসদকেইজনক বিজেপিৰে চামিলত সন্মতি প্রদান কৰে। 

আপৰ পৰা বিজেপিত যোগদান কৰা ৰাজ্য সভাৰ সাতজন সাংসদ হৈছে ক্রমে-ৰাঘৱ চাদ্ধা, সন্দীপ পাঠক, স্বাতি মালিৱাল, হৰভজন সিং, বিক্ৰমজিৎ সাহনী, অশোক মিটাল আৰু ৰাজেন্দৰ গুপ্তা। এই সাতজন সাংসদে বিজেপিৰে একত্ৰীকৰণৰ বাবে ৰাজ্য সভাৰ অধ্যক্ষলৈ পত্র প্ৰেৰণ কৰিছিল। ইফালে পঞ্জাবৰ মুখ্যমন্ত্ৰী ভগৱন্ত মানে আকৌ এই সাংসদকেইজনক অযোগ্য ঘোষণাৰ বাবে ৰাজ্য সভাৰ অধ্যক্ষ ৰাধাকৃষ্ণণলৈ পত্ৰ প্ৰেৰণ কৰিছিল।

উৎস: দৈনিক জনমভূমি