ডিজিটেল ডেস্কঃ ছ’চিয়েল মিডিয়া হাজাৰ হাজাৰ ভিডিঅ’ৰে ভৰি থাকে, তাৰে কিছুমানে নেটিজেনৰ দৃষ্টি আকৰ্ষণ কৰে আৰু ভাইৰেল হৈ পৰে। শেহতীয়াকৈ ফুড ডেলিভাৰী বয়ৰ এনে এটা ভিডিঅ’ ভাইৰেল হৈ পৰিছে যিয়ে সকলোকে আৱেগিক কৰি তুলিছে। ভিডিঅ’টোত দেখা গৈছে ৰাজপথত এজন ছুইগী ডেলিভাৰী বয়ে জমেট’ ডেলিভাৰী বয়ক সহায় কৰাৰ এক মনোৰম দৃশ্য।
দিল্লীৰ ৰাজপথৰ ভিডিঅ’টোত দেখা গৈছে এগৰাকী ছুইগী ডেলিভাৰী বয়ে বাইক চলাই গৈ আছে আৰু তেওঁৰ ঠিক কাষতে এজন জমেট’ ডেলিভাৰী বয়ে চাইকেল চলাই গৈ আছে। ছুইগী বয়জনে জমেট’ বয়জনৰ চাইকেলখন ধৰি আগুৱাই লৈ গৈছে যাতে জমেট’ বয়জনে বেছি বেগেৰে যাত্ৰা কৰিব পাৰে।
নিঃসন্দেহে এই ক্লিপটো নেটিজেনসকলৰ প্ৰিয় হৈ পৰিছে আৰু এই এই ভিডিঅ’টোক অন্যতম শ্ৰেষ্ঠ ক্লিপ বুলি অভিহিত কৰিছে বহু লোকে। ফুড ডেলিভাৰী কোম্পানীৰ জগতত ছুইগী আৰু জমেট’ দুয়োটা প্ৰতিদ্বন্দ্বী কোম্পানী। পেছাদাৰী প্ৰতিদ্বন্দ্বিতা আছে যদিও দিল্লীৰ প্ৰচণ্ড তাপত ছুইগী বয়জনে জমেট’ বয়জনলৈ আগবঢ়াই দিছে সহমৰ্মিতাৰ দুহাত।
চাওঁক ভিডিঅ’
ভিডিঅ’টো ইনষ্টাগ্ৰামত শ্বেয়াৰ কৰিছিল ছান্নাহ আৰোৰা নামৰ ইউজাৰে ৯ জুলাইত।ভিডিঅ’টোত তেওঁ কেপশ্বন দিছিল-''দিল্লীৰ এই অতি উত্তপ্ত আৰু অসহ্যকৰ দিনবোৰত দেখা পোৱা প্ৰকৃত বন্ধুত্ব।'' ক্লিপটো ৭ লাখ ৫০ হাজাৰতকৈও অধিক লোকে এতিয়ালৈকে লাইক কৰিছে। বহুতে কমেণ্ট কৰি কৈছে যে মানৱতাৰ এয়া এক নিখুঁত উদাহৰণ। কিছুমানে কৈছে ''কোম্পানীয়ে ভাগ ভাগ কৰে আৰু মানৱতাই এক কৰে।''
Continue Reading
