ডিজিটেল ডেস্কঃ যুদ্ধৰ দামামা বাজি উঠা ইজৰাইলত এতিয়া সকলোতে কেৱল এক ভয়ৰ পৰিবেশে বিৰাজ কৰিছে।যুদ্ধভূমি গাজাৰ পৰা অপহৰণ কৰা হৈছে বহু বিদেশী লোকক। হামাছে অপহৰণ কৰি নিয়া এগৰাকী জাৰ্মান যুৱতী ছনি লুকৰ মৃত্যুৰ কথা ঘোষণা কৰিছে। তেওঁৰ মৃতদেহ উদ্ধাৰো কৰা হৈছে। ইয়াৰ মাজতে ইজৰাইলৰ ৰাষ্ট্ৰপতি আইজাক হাৰজগে ছনিৰ মৃত্যুৰ প্ৰসংগকলৈ হামাছক কঠোৰ সমালোচনা কৰিছে। জাৰ্মান যুৱতীগৰাকীক হামাছে শিৰচ্ছেদ কৰি হত্যা কৰা বুলি তেওঁ দাবী কৰিছে।
হাৰজগে জাৰ্মান দৈনিক বিল্ডক কৈছে, "মই অত্যন্ত দুঃখিত। ছনিৰ মৃত্যুৰ খবৰ আমি পাইছো। এয়া নিশ্চিত যে তেওঁক হত্যা কৰা হৈছে। ছনিৰ মূৰটো উদ্ধাৰ কৰা হৈছে। যাৰ অৰ্থ হৈছে এয়াই যে সেই বৰ্বৰ জন্তুবোৰে তেওঁক শিৰচ্ছেদ কৰি হত্যা কৰিছে।’’ ইজৰাইলৰ ৰাষ্ট্ৰপতিগৰাকীয়ে লগতে কয় : "মানুহক নিৰ্মমভাৱে অত্যাচাৰ কৰা হৈছে। বহুতকে জ্বলাই হত্যা কৰা হৈছে। "
ইজৰাইলে কালি এক্স-হেণ্ডেলত এক বিবৃতিত কয়, "আমি হতবাক হৈছো। এগৰাকী ২৩ বছৰীয়া জাৰ্মান যুৱতী ছনি লুকৰ মৃত্যু হৈছে। তেওঁক হামাছে এটা সংগীত অনুষ্ঠানৰ পৰা অপহৰণ কৰি নিছিল। তেওঁক অকথ্যভাৱে অত্যাচাৰ কৰা হৈছিল। ’’
উল্লেখ্য ৭ অক্টোবৰত হামাছে ইজৰাইলৰওপৰত মাৰাত্মক আক্ৰমণ চলাইছিল। তাৰ পিছতে হামাছে সাধাৰণ মানুহৰ ওপৰত চলোৱা নিৰ্মম অত্যাচাৰৰ ছবি দেখি সমগ্ৰ বিশ্ব স্তম্ভিত হৈ পৰিছিল। ছনিৰ ওপৰত হোৱা অত্যাচাৰৰ এটা ভিডিঅ' মুকলি কৰা হৈছিল। ইয়াত এগৰাকী যুৱতীৰ নগ্ন মৃতদেহ হামাছ সন্ত্ৰাসবাদীয়ে এখন পিক-আপ ভানত কঢ়িয়াই নিয়া দেখা গৈছে। জানিব পৰা মতে মৃত্যু ঘটা যুৱতীগৰাকী পেছাত এগৰাকী টাটু শিল্পী আছিল।
Continue Reading
