শিৱই ৰক্ষা কৰিব ইউক্ৰেইন, ডিঙিত ত্ৰিশূল-ৰুদ্ৰাক্ষ পিন্ধি যু্দ্ধত নামিছে মহিলা সৈনিক

ডিজিটেল ডেস্ক : ৰুছ একাধিপত্যত তচনচ সমগ্ৰ ইউক্ৰেইন। সংহাৰলীলা চলিছে ১৯ দিনে। ইখনৰ পাছত সিখন ইউক্ৰেইনী চহৰ তচনচ কৰিছে ৰুছ মিছাইল আক্ৰমণে। লাখ লাখ লোক গৃহহীন হৈ নিৰাপদ আশ্ৰয়ৰ সন্ধানত অনাই-বনাই ঘূৰি ফুৰিবলগীয়া হৈছে। মৃত্যু হৈছে হাজাৰ হাজাৰ লোকৰ। এই বিভীষিকাময় পৰিস্থিতিৰ মাজতো মনত এক অতুলনীয় দৃঢ়তা আৰু আত্মবিশ্বাস লৈ যুঁজ কৰি আছে ইউক্ৰেইন ৰ সৈনিকসকলে। ৰুছ আগ্ৰাসন প্ৰতিৰোধ কৰাটো কঠিন হৈ পৰাৰ পাছতো এতিয়াও যুদ্ধক্ষেত্ৰত অকনো শিথিলতা দেখুওৱা নাই ইউক্ৰেইনৰ সেনাই। দেশখনৰ ৰাষ্ট্ৰপতি ভ’ল’ডিমিৰ জেলেনস্কীয়েও প্ৰৱল দৃঢ়তা আৰু তীব্ৰ দেশপ্ৰেমৰ নিদৰ্শন দাঙি ধৰি যুদ্ধক্ষেত্ৰত অটল হৈ আছে। তাৰ মাজতে এগৰাকী ইউক্ৰেইনী মহিলা সৈনিকৰ কাহিনীয়ে বিশেষ চৰ্চা লাভ কৰিছে। এইগৰাকী মহিলা সৈনিক হৈছে ভগৱান শিৱৰ পৰম ভক্ত। ভাৰতৰ আগশাৰীৰ সংবাদ প্ৰতিষ্ঠান ‘আজ টক’-এ এইগৰাকী সৈনিকৰ সৈতে কথাবতৰা পতাৰ সময়ত শিৱৰ প্ৰতি তেওঁৰ অগাধ ভক্তি তথা বিশ্বাসৰ কথা পোহৰলৈ আহে। হিন্দু ধৰ্মৰ এইগৰাকী মহান দেৱতাৰ ভক্ত মহিলা সৈনিকগৰাকীয়ে ডিঙিত ত্ৰিশূল আৰু ডম্বৰুৰ প্ৰতীক তথা ৰুদ্ৰাক্ষও পৰিধান কৰে। যুদ্ধভূমিত ‘আজ টক’ৰ সাংবাদিক শ্বেতা সিঙে ইউক্ৰেইনৰ এগৰাকী মহিলা কমাণ্ডোৰ সৈতে কথা পাতিছিল৷ ইউক্ৰেইনৰ এই মহিলা কমাণ্ডোগৰাকীৰ নাম ওলেনা।  কিন্তু তেওঁৰ আছে এটা হিন্দু নামো। হিন্দু দৰ্শন আৰু আদৰ্শক প্ৰতিনিধিত্ব কৰা এই নাম হৈছে অদিতি। অদিতিৰ দেৱতাৰ মাতৃ বুলি গন্য কৰা হয়। অদিতিৰ ভগৱান শিৱৰ ওপৰত যথেষ্ট বিশ্বাস আছে। ওলেনাই বিশ্বাস কৰে যে, শিৱই এতিয়া তেওঁক আৰু তেওঁৰ দেশক ৰাছিয়াৰ আক্ৰমণৰ পৰা ৰক্ষা কৰিব। সংবাদ মাধ্যমৰ সৈতে হোৱা কথা-বতৰাৰ সময়ত তেওঁ কয়, মই শিৱ আৰু শক্তিৰ আৰাধনা কৰোঁ আৰু মোৰ ওচৰত শিৱলিংগও আছে। শিৱ শক্তিশালী আৰু মই নিজকে শিৱ শক্তিৰ সৈত যুক্ত হৈ থকা বুলি গণ্য কৰোঁ। ইউক্ৰেইনৰ বাবে এতিয়াৰ সময় হৈছে পৰিৱৰ্তনৰ সময়। মোৰ বিশ্বাস যে শিৱ ইউক্ৰেইনৰ সৈতে আছে। যুদ্ধক্ষেত্ৰত সমৰকৌশল সম্পৰ্কীয় প্ৰশিক্ষণ দিয়া ওলেনা ওৰফে অদিতিৰ এই বিশ্বাসে ইউক্ৰেনৰ ৰুছ আগ্ৰাসনৰ পৰা ৰক্ষা কৰিব পাৰে নে নাই সেয়া সময়েহে ক’ব যদিও ইউক্ৰেইনৰ এগৰাকী সৈনিকৰ হিন্দু দেৱতা এগৰাকীৰ প্ৰতি এই বিশ্বাস তথা হিন্দু দৰ্শন আৰু আদৰ্শৰ প্ৰতি এই শ্ৰদ্ধা তাৎপৰ্যপূৰ্ণ  কথা হিচাপে বিবেচিত হৈছে।