ডিজিটেল ডেস্কঃ বিশাখাপত্তনমৰ বন্দৰত সংঘটিত হৈছে এক বিধ্বংসী অগ্নিকাণ্ডৰ ঘটনা। অন্ধ্ৰ প্ৰদেশৰ বিশাখাপত্তনম বন্দৰত ৪০ খনকৈ মাছ ধৰা নাওত সংঘটিত অগ্নিকাণ্ডই তীব্ৰ প্ৰতিক্ৰিয়াৰ সৃষ্টি কৰিছে। অৱশ্যে এই ঘটনাত কোনো লোক হতাহত হোৱাৰ খবৰ পোৱা হোৱা নাই। মাছমৰীয়াসকলে অনুমান কৰিছে যে এই অগ্নিকাণ্ডৰ ফলত কমেও ৩০ কোটি টকাৰ লোকচান হৈছে।
মাছমৰীয়াসকলে মাছ ধৰিবলৈ ব্যৱহাৰ কৰা নাওবোৰত কিদৰে একেসময়তে জুই লাগিল সেয়া ৰহস্যৰ বিষয় হৈ পৰিছে। নাওবোৰ এনেদৰে জ্বলি যোৱাৰ ফলত মাছমৰীয়াসকলে মূৰে-কপালে হাত দিবলগীয়া হৈছে। তেওঁলোক এতিয়া জীৱিকাকলৈ চিন্তিত হৈ পৰিছে।বিশাখাপত্তনম আৰক্ষীয়ে জনোৱা অনুসৰি দেওবাৰে নিশা প্ৰায় ১১.৩০ বজাত বন্দৰত ৰখাই থোৱা এখন নাওত বিস্ফোৰণৰ শব্দ শুনা গৈছিল। তাৰ পৰাই জুই বিয়পি পৰে। খবৰ পোৱাৰ পিছতে অগ্নি নিৰ্বাপক বাহিনী ঘটনাস্থলীত উপস্থিত হয় আৰু লগে লগে অগ্নি নিৰ্বাপনৰ কাম আৰম্ভ কৰে। প্ৰথমে নাওবোৰত থকা মাছমৰীয়াসকলক আঁতৰ কৰাৰ কাম কৰা হয়।
ইয়াৰ পিছত, কেইবাখনো অগ্নিনিৰ্বাপক বাহনৰ সহায়ত জুই নিয়ন্ত্ৰণলৈ অনা হয়। কিন্তু নাওবোৰ ৰক্ষা কৰিব পৰা নগ'ল। কমেও ৪০ খন নাও ধ্বংস হৈছে বুলি জানিব পৰা গৈছে। আৰক্ষী বিষয়া আনন্দ ৰেড্ডীয়ে কয় যে প্ৰথমে নাও এখনৰ ইন্ধন টেংকত বিস্ফোৰণৰ ঘটাৰ ফলত এই অগ্নিকাণ্ড সংঘটিত হৈছে বুলি ধাৰণা কৰা হৈছে। অৱশ্যে, মাছমৰীয়াসকলে অভিযোগ কৰিছে যে দুৰ্বৃত্তইনাওবোৰত জুই লগাই দিছে। আৰক্ষীয়ে এটা গোচৰ ৰুজু কৰি তদন্ত আৰম্ভ কৰিছে।
Continue Reading
