ডিজিটেল ডেস্কঃ বৃহস্পতিবাৰে (২৭ জুন) সংসদৰ দুয়োখন সদনৰ যৌথ বৈঠকত ৰাষ্ট্ৰপতি দ্ৰৌপদী মুৰ্মুৱে ভাষণ প্ৰদান কৰে। ইয়াৰ মাজতে তেওঁ ১৯৭৫ চনত জাৰি কৰা জৰুৰীকালীন অৱস্থাক সংবিধানৰ ওপৰত প্ৰত্যক্ষ আক্ৰমণ আৰু অন্ধকাৰ অধ্যায় বুলি অভিহিত কৰে। কিন্তু এতিয়া কংগ্ৰেছে ৰাষ্ট্ৰপতিৰ ভাষণৰ সময়ত সংসদ টিভিত বাৰে বাৰে প্ৰধানমন্ত্ৰী মোডীক দেখুওৱাৰ প্ৰতিক্ৰিয়া প্ৰকাশ কৰিছে।
কংগ্ৰেছৰ সাধাৰণ সম্পাদক জয়ৰাম ৰমেশে চৰকাৰৰ বিৰুদ্ধে অভিযোগ কৰে। তেওঁ দাবী কৰে যে ৰাষ্ট্ৰপতি মুৰ্মুৰ সংসদত ভাষণৰ সময়ত প্ৰধানমন্ত্ৰী মোডীক ৭৩ বাৰ আৰু বিৰোধী নেতা ৰাহুল গান্ধীক ৬ বাৰ দেখুওৱা হৈছিল।
জয়ৰাম ৰমেশে এক্সত পোষ্ট কৰি লিখিছে, "৫১ মিনিটৰ ৰাষ্ট্ৰপতিৰ ভাষণত কাক কিমানবাৰ দেখুওৱা হ'ল? সদনৰ নেতা নৰেন্দ্ৰ মোডীক ৭৩ বাৰ আৰু বিৰোধী দলপতি ৰাহুল গান্ধীক ৬ বাৰ দেখুওৱা হয়। চৰকাৰক ১০৮ বাৰ আৰু বিৰোধীক ১৮ বাৰ দেখুওৱা হৈছে। সংসাদ টিভিৰ উদ্দেশ্য হৈছে সদনৰ কাৰ্য্যবিধি দেখুৱাবলৈ, কেমেৰামেনৰ নাৰ্চিছিজমৰ বাবে নহয়।’’
ৰাষ্ট্ৰপতি দ্ৰৌপদী মুৰ্মুৱে ১৮ সংখ্যক লোকসভাত প্ৰথমবাৰৰ বাবে দুয়োখন সদনৰ যৌথ অধিৱেশনত ভাষণ দি কয় যে অনাগত কেইমাহমানৰ ভিতৰত ভাৰতে গণৰাজ্য হিচাপে ৭৫ বছৰ সম্পূৰ্ণ কৰিবলৈ ওলাইছে। তেওঁ কয় যে বিগত দশকবোৰত ভাৰতৰ সংবিধানে প্ৰতিটো প্ৰত্যাহ্বান আৰু প্ৰতিটো পৰীক্ষাৰ সন্মুখত থিয় দিছে আৰু সংবিধান নিৰ্মাণৰ সময়তো পৃথিৱীত এনে শক্তি আছিল যিয়ে ভাৰতক বিফল হোৱাটো বিচাৰিছিল। ৰাষ্ট্ৰপতিগৰাকীয়ে ভাষণত কয় যে দেশত সংবিধান কাৰ্যকৰী হোৱাৰ পিছতো সংবিধানক বহুবাৰ আক্ৰমণৰ সন্মুখীন হৈছে।
Continue Reading
