ডিজিটেল ডেস্কঃ অভিভাৱকসকলে যদি তেওঁলোকৰ সন্তানৰ ফটো ছচিয়েল মিডিয়াত আপলোড কৰে তেন্তে শাস্তিৰ সন্মুখীন হ’ব। অৱশ্যে এই নিয়ম ভাৰতত কৰা হোৱা নাই। এই নিয়ম কৰা হৈছে ফ্ৰান্সত । প্ৰযুক্তিবিদ্যাৰ যুগত বহুতে শিশুটিৰ হাঁহি, ছুনুক-থানাক মাত উচ্চাৰণ, প্ৰথমে খোজকঢ়া আদিৰ ছবি তথা ভিডিঅ' ছ’চিয়েল মিডিয়াত আপলোড কৰে।
শিশুৰ জন্মদিনৰ কেক কটা আদি কথাবোতো আছেই। কিন্তু ফ্ৰান্সত সেয়া আৰু কৰিব নোৱাৰিব। ছ'চিয়েল মিডিয়াত শিশুৰ ফটো পোষ্ট কৰাটো দেশ খনত শীঘ্ৰে নিষিদ্ধ কৰা হ’ব পাৰে। এই সন্দৰ্ভত এখন আইন প্ৰণয়ন কৰা হৈছে। যদি কোনোবাই এই আইন ভংগ কৰে তেন্তে শাস্তিৰ সন্মুখীন হ'ব লাগিব। ফ্ৰান্সৰ আইন প্ৰণেতাসকলে কয় যে শিশুৰ গোপনীয়তা সুৰক্ষিত কৰিব লাগিব।
নতুন বিধেয়কখন গৃহীত কৰোৱা ফ্ৰান্সৰ সাংসদ ব্ৰোনো ষ্টুডাৰে কয় যে অভিভাৱকসকলে ক'ব পাৰে যে তেওঁলোকে তেওঁলোকৰ সন্তানৰ ফটো ছচিয়েল মিডিয়াত পোষ্ট কৰিবই । তাত আনৰ আপত্তি ক’ত? কিন্তু এইক্ষেত্ৰত শিশুটিৰ সন্মতিও গুৰুত্বপূৰ্ণ কথা।
এই যুক্তিৰ আধাৰতেই নতুন বিধেয়কখন গৃহীত হৈছে। আইনখন সোনকালেই ফ্ৰান্সত কাৰ্যকৰী হ'ব। তাৰ পিছত যদি কোনো অভিভাৱকে আইন অনুসৰণ নকৰাকৈ শিশুৰ ফটো ছচিয়েল মিডিয়াত পোষ্ট কৰে তেন্তে ব্যৱস্থা লোৱা হ'ব। শিশু মনোবিজ্ঞানীসকলে ফ্ৰান্সৰ নতুন আইন খনৰ প্ৰশংসা কৰিছে।
