সন্ত্ৰাসবাদৰ বিৰুদ্ধে কঠোৰ স্থিতি! এদিনতে ৮১জনক মৃত্যুদণ্ড চৌদি আৰৱৰ

ডিজিটেল ডেস্কঃ এদিনতে ৮১জনৰ মৃত্যুদণ্ড কাৰ্যকৰী কৰি অভিলেখ গঢ়িলে চৌদি আৰৱে। চৌদি আৰবে শনিবাৰে হত্যা আৰু উগ্ৰপন্থী গোটৰ সৈতে সম্পৰ্ককে ধৰি বিভিন্ন অপৰাধত দোষী সাব্যস্ত হোৱা ৮১ জন লোকক মৃত্যুদণ্ড প্ৰদান কৰে।ইয়াৰ ভিতৰত আল কায়দা, আই এছ আৰু ইয়েমেনৰ হাউথি বিদ্ৰোহীও আছে। চৌদি আৰৱৰ আধুনিক ইতিহাসত এইটো প্ৰথম ঘটনা য'ত এদিনত সৰ্বাধিক সংখ্যক লোকক মৃত্যুদণ্ড দিয়া হৈছে। ইয়াৰ পূৰ্বে চৌদি আৰবে ১৯৮০ চনৰ জানুৱাৰী মাহত মক্কাৰ ডাঙৰ মছজিদৰ সৈতে সম্পৰ্কিত এটা জিম্মি গোচৰত দোষী সাব্যস্ত হোৱা ৬৩ জন উগ্ৰপন্থীক মৃত্যুদণ্ড দিছিল। ২০১৬চনত চৌদি আৰৱত একেলগে ৪৭জনৰ মৃত্যুদণ্ড কাৰ্যকৰী কৰা হৈছিল। ২০১৯ চনত ৩৭জন চৌদি আৰৱৰ নাগৰিকৰ শিৰচ্ছেদ কৰি মৃত্যুদণ্ড দিয়া হৈছিল। চলিত বৰ্ষৰ ১২ মাৰ্চত ৮১জনক একেলগে মৃত্যুদণ্ড চৌদি আৰৱে গঢ়িলে নতুন অভিলেখ। মৃত্যুদণ্ড দিয়া ৮১জন অপৰাধীৰ ভিতৰত ৭৩জনেই হৈছে চৌদি আৰৱৰ নাগৰিক। বাকী ৭জন ইয়েমেন আৰু এজন ছিৰিয়াৰ নাগৰিক। সন্ত্ৰাসবাদৰ বিৰুদ্ধে চৌদি আৰৱে কিমান কঠোৰ পদক্ষেপ গ্ৰহণ কৰে সেই কথা এই ঘটনাৰ পৰাই বুজিব পাৰি। আৰু পঢ়কঃ এগৰাকী মহিলা অটো চালকৰ আদৰ্শ! মহিলা, বৃদ্ধক আগবঢ়ায় বিশেষ সেৱা