‘সোণৰ কণী পৰা হাঁহ!’ মাহেকত মালিকক দিছে ৩ লক্ষাধিক টকা

ডিজিটেল ডেস্কঃ ‘সোণৰ কণী পৰা হাঁহ…’-সাধুকথাটো আপোনাৰ নিশ্চয় মনত আছে। সাধুকথাৰ পৰা ওলাই সোণৰ কণী পৰা হাঁহ বাস্তৱজগত পালেহি! মাহেকত ৩ লক্ষাধিক টকা উপাৰ্জন কৰিছে হাঁহটোৰ গৰাকীয়ে।

মৰমলগা জীৱ-জন্তুৰ ভিডিঅ’বোৰ সহজতেই ভাইৰেল হৈ পৰে ছ’চিয়েল মিডিয়াত। এনেবোৰ ভিডিঅ’ প্ৰায়েই বহুলভাৱে চৰ্চিত তথা প্ৰসাৰিত হয়। এইবাৰ এটা হাঁহে ৰাজত্ব কৰিছে ইণ্টাৰনেটত। আমেৰিকাৰ পেনছিলভেনিয়াৰ ২০ বছৰীয়া ক্ৰিছী এলিছ নামৰ যুৱতীগৰাকীৰ পোহনীয়া হাঁহজনীৰ টিকটকৰ ফল’ৱাৰৰ সংখ্যা ২.৭ মিলিয়নৰো অধিক। ক্ৰিছীয়ে শৈশৱকালৰ পৰাই হাঁহ পালন কৰি আহিছে। ক্ৰিছী আৰু হাঁহজনীৰ 'ডাংকিন ডাকছ' নামেৰে ছ’চিয়েল মিডিয়াত এটা একাউণ্ট আছে। 'ডাংকিন ডাকছ'ৰ ইনষ্টাগ্ৰাম পেজত প্ৰায় ২,৫৪,০০০ আৰু টিকটকত প্ৰায় ২.৭ মিলিয়ন ফল'ৱাৰ আছে।

হাঁহজনীয়ে গৰাকী ক্ৰিছীক টিকটক আৰু ইনষ্টাগ্ৰামৰ পৰা মাহিলী অতি কমেও ৪,৫০০ ডলাৰ উপাৰ্জনত সহায় কৰে যাৰ ভাৰতীয় মূল্য প্ৰায় ৩,৩৪,৩৬৩.০৫ টকা। ক্ৰিছীৰ উপাৰ্জনৰ প্ৰাথমিক উৎস টিকটকৰ ক্ৰিয়েটৰ ফাণ্ড। লগতে ক্ৰিছীয়ে ইনষ্টাগ্ৰামত 'স্পনছৰড কনটেণ্ট' পোষ্ট কৰিও পইচা উপাৰ্জন কৰে।

উল্লেখযোগ্য যে, পূৰ্বতে ক্ৰিছীয়ে সপ্তাহত ৪০ ঘণ্টা এখন দোকানত কাম কৰি যিমান পইচা উপাৰ্জন কৰিছিল এতিয়া হাঁহজনীৰ ভিডিঅ’ৰ জৰিয়তে তাতকৈ বহুগুণে বেছি টকা উপাৰ্জন কৰিবলৈ সক্ষম হৈছে বুলি যুৱতীগৰাকীয়ে জানিবলৈ দিয়ে। সোণৰ কণী পৰা হাঁহটো কাল্পনিক হ'লেও এই হাঁহজনী কোনোগুণে কম নহয়।