সমগ্ৰ এছিয়া আৰু ইউৰোপত গুৰুতৰ প্ৰভাৱ পেলাইছে প্রবল গ্রীষ্ম প্রৱাহে

ডিজিটেল ডেস্ক : ভাৰতৰ দিল্লী-ৰাষ্ট্ৰীয় ৰাজধানী অঞ্চলৰ (এন চি আৰ) পৰা আৰম্ভ কৰি ইউৰোপৰ লণ্ডনলৈকে প্রবল গ্রীষ্ম প্রৱাহে জনজীৱনত ব্যাপক প্রভাৱ পেলাইছে। স্বাভাৱিকতে কম তাপমাত্রা থকা লণ্ডন মহানগৰৰ এই উষ্ণতাৰ অস্বাভাৱিক বৃদ্ধিয়ে বিশ্বৰ পৰিৱেশৰ প্রতি অশনি সংকেত আহিছে।

জলবায়ু পৰিৱৰ্তনৰ দৰে পৰিঘটনাৰ বাবে গোলকীয় উষ্ণতা বৃদ্ধি পোৱাৰ পৰিপ্ৰেক্ষিতত সমগ্র মহাদেশবোৰতে প্রবল গ্রীষ্ম প্রৱাহ হৈছে। যোৱা সোমবাৰে দিল্লীত ১৪ বছৰৰ ভিতৰত নিশাৰ ভাগত সর্বাধিক তাপমাত্ৰাৰ অভিলেখ হয়। ইফালে, লণ্ডনত ঐতিহাসিকভাৱে তাপমাত্রাই ৩৫ ডিগ্ৰী চেলছিয়াছ অতিক্ৰম কৰে। ব্রিটেইনৰ ইতিহাসত এয়া হৈছে সর্বোচ্চ তাপমাত্রা। 

আনহাতে, সমগ্ৰ এছিয়া আৰু ইউৰোপত প্রবল গ্রীষ্ম প্রৱাহে জনজীৱনত গুৰুতৰ প্ৰভাৱ পেলাইছে। আধুনিক মহানগৰসমূহত কোটি কোটি জনতাৰ বসতি, ওখ ওখ অট্টালিকাৰ আন্তঃগাঁথনি আৰু প্রবল প্রদূষণে সৃষ্টি কৰিছে প্রবল গ্ৰীষ্ম প্ৰৱাহৰ। বিশেষকৈ আপেক্ষিকভাৱে ঠাণ্ডা ইউৰোপীয় মহানগৰসমূহত উষ্ণতা বৃদ্ধিয়ে বিশ্বৰ পৰিৱেশৰ প্রতি ভাবুকি আনিছে। ভাৰতৰ বিভিন্ন অঞ্চলত উষ্ণতাই ৪৮ ডিগ্রী চেলছিয়াছ অতিক্রম কৰিছে। বিশ্বৰ ১০০খন গৰম মহানগৰৰ ভিতৰত ভাৰতৰ ৫০খনে ঠাই পাইছে। 

ইফালে, পশ্চিমীয়া ইউৰোপীয় মহানগৰসমূহত অভূতপূর্ব বতৰৰ পৰিৱৰ্তন ঘটিছে। ১৯৪৪ চনৰ পাছত দক্ষিণ-পশ্চিম লণ্ডনত কিউ গার্ডেনছত উষ্ণতা ৩৫.১ ডিগ্রী চেলছিয়াছৰ অভিলেখ হয়। ঠিক সেইদৰে স্বাভাৱিকতে ঠাণ্ডা দেশ ফ্রান্সতো প্রবল গ্রীষ্ম প্ৰৱাহ হৈছে। ফ্ৰান্সৰ বিভিন্ন অঞ্চলত তাপমাত্রা ৩৯ ডিগ্রী চেলছিয়াছ পর্যন্ত হৈছে। বতৰ বিজ্ঞানীসকলে প্রকাশ কৰা মতে, উত্তৰ আফ্ৰিকাৰ পৰা বলা গৰম বতাহৰ বাবে সমগ্র ইউৰোপত স্বাভাৱিকতকৈ তাপমাত্রা অধিক বৃদ্ধি পাইছে।

উৎস: দৈনিক জনমভূমি