সুখী আৰু ইতিবাচক হ'ব বিচাৰেনে? আনলৈ নহয় নিজলৈ চাওক

১) নিজকে প্ৰশ্ন কৰক- নিজকে প্ৰশ্ন কৰক। এই পৃথিৱীলৈ কি মই আনৰ কথা ভাবিবলৈ আহিছো নেকি? মোৰ নিজৰ জীৱনতকৈ কিয় মই আনৰ জীৱনৰ কথা বেছিকৈ ভাবিবলৈ লৈছো। আনে কি কৰিছে, আনে কি খাইছে, আনে ক'ত গৈছে আদি কথাবোৰতে মই মূৰ ঘমাই থাকিলে মোৰ জীৱনত কি লাভ হ'ব নে কিবা উন্নতি হ'ব? মই আনৰ কথা তেতিয়াহে ভাবিম যেতিয়া এয়া ইতিবাচক হ'ব, কেনেকৈ মই আনৰ দুখ দূৰ কৰিব পাৰিম, কেনেকৈ মই আনৰ চকুলো মচিব পাৰিম আদি কথাবোৰতহে মই আনৰ কথা ভাবিম। 

২) আপোনাৰ চৌপাশে ইতিবাচক পৰিৱেশ গঢ়ি তোলক-যিসকল লোকে আপোনাৰ লগত গুৰুত্বপূৰ্ণ কথা পাতে, নানা ভাল তথ্য শ্বেয়াৰ কৰে বা আপোনাক প্ৰেৰণা দিয়ে, উৎসাহ দিয়ে আপুনি তেনে লোকৰ লগত অধিক সময় কটাওক। এনে ইতিবাচক মানুহবোৰৰ লগত যিমান পাৰি সিমান সময় কটাওক, তেওঁলোকৰ সৈতে মন খুলি কথা পাতক। ইয়াৰ লগে লগে নেতিবাচক কথা কোৱা লোকসকলৰ পৰা আঁতৰত থাকক। যিয়ে আনৰ কথা পাতি আপোনাৰ লগত সময় পাৰ কৰে সেইজন লোকে আনৰ আগতো আপোনাৰ কথা কৈ সময় পাৰ কৰিব। গতিকে আপুনি কেনে মানুহৰ সান্নিধ্যৰে নিজৰ জীৱনটো জীয়াব বিচাৰে সেয়া নিজে চিন্তা কৰি চাওক। যদি ইতিবাচক মানুহৰ সান্নিধ্যত আপুনি জীৱন কটায়, আপুনি নিজে নিজৰ পৰিৱৰ্তন দেখিবলৈ পাব। 

৩) আপোনাৰ হাতত থকা বস্তুবোৰৰ বাবে কৃতজ্ঞ হওক- মানুহে প্ৰায়ে কয় যে মোৰ এই বস্তুটো থাকিলে ভাল আছিল বা আনৰ বস্তুবোৰ দেখি মোৰ এই বস্তুটো কিয় নাই আদি কথাবোৰ চিন্তা কৰি নিজৰ মনটো নিজে বেয়া লগাই থাকে। আপুনি এটা কথা ভাবক যে আপোনাৰ যি যি আছে সেয়া আন বহুতৰে নাই। আপোনাৰ ওচৰত থকা বহু বস্তুৰ বাবে মানুহে হাবথুৰি খায়। আনলৈ নহয় নিজলৈ চাওক যে আপোনাৰ কি কি আছে। আপোনাৰ ওচৰত যি আছে সেয়া আকাশৰ পৰা সৰি পৰা নাই বা বতাহত উৰি অহা নাই। আপোনাৰ লগত থকা বস্তবোৰো আপুনি নিজে হাচিল কৰিছে বা আপোনাৰে পৰিয়ালৰ কোনো লোকে কষ্ট কৰি অৰ্জন কৰিছে। গতিকে আপোনাৰ ওচৰত থকা প্ৰতিটো বস্তুৰ প্ৰতি কৃতজ্ঞ হ'বলৈ শিকক। 

 

৪) নিজকে পাহৰি নাযাব- নিজক পাহৰি নাযাব। আশাবাদী হ'বলৈ শিকক। যিকোনো পৰিস্থিতিত নিজৰ যত্ন লবলৈ নাপাহৰিব। এনে অৱস্থাত নিজৰ শাৰীৰিক স্বাস্থ্যৰ প্ৰতি সম্পূৰ্ণ গুৰুত্ব দিয়ক। অলপকৈ সময় উলিয়াই ব্যায়াম কৰক, খোজকাঢ়ক। শাৰীৰিক স্বাস্থ্যৰ লগে লগে মানসিক স্বাস্থ্যৰ ওপৰত গুৰুত্ব দিয়াটোও অতি জৰুৰী। ফুল পুলি ৰোৱক, বাৰীতে শাক-পাচলি ৰোৱক, গান শুনক, গান গাবলৈ চেষ্টা কৰক, নাচিবলৈ শিকক, মনৰ আনন্দেৰে নাচক, যোগভ্যাস কৰক, ঘৰখন পৰিপাটিকৈ সজাওক, সুস্বাদু খাদ্য ৰান্ধিবলৈ চেষ্টা কৰক, হাতৰ নানা কাম কৰিবলৈ যত্ন কৰক, যাৰ লগত কথা পাতিলে আপোনাৰ মনটো এনেই ভাল লাগি যায় তেনে মানুহৰ সৈতে কথা পাতক। সকলো সময়তে আনৰ খবৰবোৰৰ হিচাপ ৰখাতকৈ আপুনি যদি এই সৰু সৰু কামবোৰেৰেও নিজকে ব্যস্ত ৰাখে তেন্তে ই আপোনাৰ মন আৰু শৰীৰ দুয়োটা সুস্থ ৰাখি মনলৈ প্ৰশান্তি আনিব। 

৫) দিনটো সঠিকভাৱে আৰম্ভ কৰক- আপুনি যিদৰে পুৱাটো আৰম্ভ কৰে, সেই ধৰণে আপোনাৰ দিনটোৰ বাকী সময়খিনি পৰিচালিত হয়। পুৱা উঠি ঈশ্বৰক ধন্যবাদ দিয়ক যে তেওঁ আপোনাক পুনৰ এটি নতুন দিন দিলে। নতুন দিন মানেই জীৱনৰ আন এক শুভৰাম্ভণি। আজিৰ দিনটোতে আপুনি কিবা নহয় কিবা আৰম্ভ কৰিব পাৰে, যিবোৰ আপুনি বহু দিনৰ পৰা ভাবি আছে। বিচনাৰ পৰা নমাৰ পূৰ্বেই আপুনি দীঘলকৈ উশাহ-নিশাহ লওক। প্ৰকৃতিৰ সৈতে অলপ সময় কটাওক। বাগিচাৰ সেউজীয়া, ফুলকেইপাহক নয়ন জুৰাই চাওক। চোতালত খেলি থকা চৰাইকেইটালৈ প্ৰাণভৰি চাওক। মূৰ তুলি মুকলি আকাশখন চাওক। মানসিক চাপমুক্ত পুৱাৰে দিনটো আৰম্ভ কৰিলে প্ৰায়ে গোটেই দিনটোত মানসিক চাপ কম হয়।

৬) ছ'চিয়েল মিডিয়াৰ আসক্তি কমাওকঃ ছ'চিয়েল মিডিয়াত আনৰ জীৱনটো বেছিকৈ পৰিস্ফূত হয়। আনৰ জীৱনৰ প্ৰতি বেছিকৈ ধ্যান ৰখাতকৈ আপুনি ছ'চিয়েল মিডিয়া এনেকৈ ব্যৱহাৰ কৰক যাতে আপোনাৰ পৰা কিবা নহয় কিবা এটা ইতিবাচক বাৰ্তা মানুহে পায়। ভালবোৰ বিলাব পাৰিলে আপোনালৈকে ই দুগুণ ভাল হৈ উভতি আহিব। পুৱা শুই উঠিয়েই ছ'চিয়েল মিডিয়াত বিচৰণ কৰাৰ পৰা বিৰত থাকক। ই মনটো কেতিয়াবা নানা ধৰণে বিক্ষিপ্ত কৰি পেলায়। গতিকে শুই উঠিয়েই নানা নঞাৰ্থক বিক্ষিপ্ত চিন্তাৰে নিজকে ভাৰাক্ৰান্ত কৰি নল'ব। অদৰকাৰী পোষ্টবোৰত যিবোৰ আপোনাৰ লগতে সমাজৰো কোনো কামত নাহে তেনে পোষ্টবোৰত কোনো প্ৰতিক্ৰিয়া নকৰিব। নিজৰ শান্তি নিজে বৰ্তাই ৰাখিব জানিলেহে আপুনি সুখী হ'ব পাৰিব। ঠিক একেদৰে ৰাতি শুৱাৰ এঘণ্টা বা আধাঘণ্টা পূৰ্বৰে পৰা ছ'চিয়েল মিডিয়াৰ পৰা আঁতৰি থাকক। মনত ৰাখিব সঠিক টোপনিয়েহে আপোনাৰ পুৱাটো সতেজ কৰে।

এইবোৰ তেনে সৰু সৰু কথা কিন্তু কিছুমান সৰু সৰু কথায়েও আমাৰ জীৱনত ডাঙৰ পৰিৱৰ্তন আনিব পাৰে। গতিকে কৰি চাওকচোন, কিজানি আপোনাৰ জীৱন ধাৰণৰ প্ৰণালী দেখি আন মানুহো আপোনাৰ দ্বাৰা অনু্প্ৰাণিত হয়।