সুস্মিতা সেন নহয় এইবাৰ ছুপাৰমডেল উজ্জ্বলা ৰাউটৰ সৈতে দেখা গ’ল পলাতক ললিত মোদীক

ডিজিটেল ডেস্কঃ আই পি এলৰ প্ৰতিষ্ঠাপক তথা পলাতক ব্যৱসায়ী ললিত মোদীয়ে যোৱা বছৰ অভিনেত্ৰী সুস্মিতা সেনৰ সৈতে কিছু ছবি পোষ্ট কৰি সেনৰ প্ৰতি থকা প্ৰেমৰ কথা প্ৰকাশ কৰি যথেষ্ট চাঞ্চল্যৰ সৃষ্টি কৰিছিল। এতিয়া যেন মোদীয়ে আকৌ এবাৰ প্ৰেম বিচাৰি পাইছে ৯০ৰ দশকৰ আন এগৰাকী ভাৰতীয় ছুপাৰ মডেল উজ্জ্বলা ৰাউটৰ ৰূপত৷

শেহতীয়াকৈ বিখ্যাত অধিবক্তা তথা ভাৰতৰ প্ৰাক্তন চলিচিটৰ জেনেৰেল হৰিশ ছালভে লণ্ডনত তৃতীয়বাৰৰ বাবে বিবাহপাশত আবদ্ধ হয়। ছালভে আৰু তেওঁৰ পত্নী ত্ৰিনাই ব্ৰিটিছ ৰাজধানীত এক অভ্যৰ্থনা অনুষ্ঠানত অংশগ্ৰহণ কৰে য’ত ধনাঢ্যসকলকে ধৰি কিছুমান উল্লেখযোগ্য ভাৰতীয় ব্যৱসায়ী, অধিবক্তা, সমাজসেৱকে অংশগ্ৰহণ কৰে। অতিথিসকলৰ ভিতৰত বৰ্তমান লণ্ডনত থকা ললিত মোদীও আছিল।

ৰিচেপচনৰ পৰা শ্বেয়াৰ কৰা ছবিত মোদীক উজ্জ্বলা ৰাউটৰ সৈতে প’জ দিয়া দেখা গৈছে। বহু বাতৰি আৰু সাংবাদিকে তেওঁলোকক কেপচনত উজ্জ্বলাক ললিত মোদীৰ ‘প্ৰেমিকা’ বুলি উল্লেখ কৰি এহাল দম্পতী বুলি চিনাক্ত কৰিছে। এখন ছবিত ললিত মোদীয়ে – ক’লা চুট পিন্ধি – চিৰিৰ ওপৰত প’জ দিয়াৰ বিপৰীতে লেভেণ্ডাৰ গাউন পিন্ধা উজ্জলাই কেইখোজমান তলত বহি প’জ দিছে।

সংবাদ মাধ্যমৰ বাতৰিয়ে ইতিমধ্যে তেওঁলোকক দম্পতী বুলি অভিহিত কৰিছে যদিও এই কথা অস্বীকাৰ বা নিশ্চিত কৰা নাই ললিত মোদী বা উজ্জ্বলা ৰাউটে। তেওঁলোকৰ ছ’চিয়েল মিডিয়াতো ইজনে সিজনৰ বিষয়ে কৰা কোনো উল্লেখ নাই।

৫৯ বছৰীয়া ললিত মোদী ভাৰতত আৰ্থিক জালিয়াতিৰ অপৰাধত পলাই থকা পলাতক। ইণ্ডিয়ান প্ৰিমিয়াৰ লীগৰ প্ৰতিষ্ঠাপক আৰু প্ৰথম আয়ুক্ত হিচাপে সুপৰিচিত মোদী,ধনাঢ্য মোদী ব্যৱসায়িক পৰিয়ালৰ বংশধৰ আৰু গডফ্ৰে ফিলিপছ ইণ্ডিয়াৰ কাৰ্যবাহী সঞ্চালক। ৪৫ বছৰীয়া উজ্জ্বলা ৰাউট ৯০ দশকৰ আগশাৰীৰ মডেল আৰু ১৯৯৬ চনৰ মিছ ইণ্ডিয়াত চূড়ান্ত প্ৰতিযোগী আছিল।তেওঁ ভিক্টোৰিয়া ছিক্ৰেট ফেশ্বন শ্ব’ৰ বাবে খোজ কাঢ়ি যোৱা প্ৰথম ভাৰতীয়সকলৰ ভিতৰত আছিল।