সূৰ্য নমস্কাৰক লৈ দেশত নতুন বিতৰ্ক, মুছলমান শিক্ষাৰ্থীয়ে অংশ ল'বনে সূৰ্য নমস্কাৰত

ডিজিটেল ডেস্ক : 'চৰকাৰে সংখ্যাগৰিষ্ঠৰ পৰম্পৰা আৰু সংস্কৃতি আনৰ ওপৰত জাপি দিবলৈ চেষ্টা কৰি আছে। এয়া অসাংবিধানিক৷' অল ইণ্ডিয়া মুছলিম পাৰ্চনেল ল' বোৰ্ডে বিদ্যালয়সমূহত শিক্ষাৰ্থীসকলে সূৰ্য নমস্কাৰ অনুশীলন কৰাৰ চৰকাৰৰ নিৰ্দেশনাৰ বিৰোধিতা কৰে। তেওঁলোকৰ মতে, মুছলমান শিক্ষাৰ্থীসকলে এনে কাৰ্যসূচীত অংশগ্ৰহণ কৰা উচিত নহয়৷

শেহতীয়াকৈ বিশ্ববিদ্যালয় অনুদান আয়োগে ২৯ ডিচেম্বৰত এক বিজ্ঞপ্তি জাৰি কৰিছিল৷ য'ত ভাৰতৰ স্বাধীনতাৰ ৭৫ তম বৰ্ষ উপলক্ষে অমৃত মহোৎসৱ উদযাপনৰ অধীনত ত্ৰিৰংগাৰ সন্মুখত সূৰ্য নমস্কাৰ কৰিবলৈ সমগ্ৰ দেশৰ ৩০,০০০ প্ৰতিষ্ঠানৰ তিনি লাখ শিক্ষাৰ্থীক কোৱা হৈছিল। ইউজিচিৰ সচিব ৰজনীশ জৈনে স্বাক্ষৰ কৰা বিজ্ঞপ্তিখনত কোৱা হৈছে, 'স্বাধীনতা দিৱসৰ ৭৫ তম বাৰ্ষিকীত অমৃত মহোৎসৱ উদযাপনৰ স্মৃতিত ফেডাৰেশ্যনে ৩০ খন ৰাজ্যত ৭৫০ নিযুত সূৰ্য নমস্কাৰৰ প্ৰকল্প চলাবলৈ সিদ্ধান্ত লৈছে, য'ত ১ জানুৱাৰীৰ পৰা ৭ ফেব্ৰুৱাৰীলৈ ৩০,০০০ প্ৰতিষ্ঠান আৰু ৩ লাখ শিক্ষাৰ্থী অন্তৰ্ভুক্ত থাকিব।

এই সিদ্ধান্ত তীব্ৰ ভাষাৰে গৰিহণা দিয়ে অল ইণ্ডিয়া মুছলিম পাৰ্চনেল ল' বোৰ্ড নামৰ সংগঠনটোৱে৷ 'চৰকাৰে সংখ্যাগৰিষ্ঠৰ পৰম্পৰা আৰু সংস্কৃতি আনৰ ওপৰত জাপি দিবলৈ চেষ্টা কৰি আছে। এয়া অসাংবিধানিক,' সংগঠনটোৰ সাধাৰণ সম্পাদক মৌলানা খালেদ ৰহমানীয়ে এইবুলিও মন্তব্য আগবঢ়ায়।

তেওঁ কয়, 'চৰকাৰে তৎক্ষণাৎ এই আদেশ প্ৰত্যাহাৰ কৰিব লাগিব আৰু দেশত ধৰ্মনিৰপেক্ষ মূল্যবোধৰ প্ৰচাৰ কৰিব লাগিব।' এনে নিৰ্দেশনা জাৰি কৰাৰ পৰিৱৰ্তে চৰকাৰে মুদ্ৰাস্ফীতি নিবনুৱা আদিৰ দৰে প্ৰকৃত বিষয়ত গুৰুত্ব দিব লাগিব বুলি তেওঁ উল্লেখ কৰে।