ডিজিটেল ডেস্কঃ ১৯৯৫ চনত মুক্তি পোৱা ব্লকবাষ্টাৰ চিনেমা ‘দিলৱালে দুলহনিয়া লে জায়েংগে’ এনে এখন চিনেমা, যিখন আজিও দৰ্শকে বাৰে বাৰে চাবলৈ ভাল পায়। ছবিখনত শ্বাহৰুখ খান আৰু কাজলৰ যুটিয়ে দৰ্শকৰ হৃদয় জয় কৰিছিল। এই ছবিখনৰ পাছত শ্বাহৰুখ খান লাখ লাখ লোকৰ হৃদস্পন্দন হৈ পৰিছিল আৰু তেওঁক ‘কিং অৱ ৰোমাঞ্চ’ বুলি অভিহিত কৰা হৈছিল।
যদি আমি আপোনালোকক কওঁ যে শ্বাহৰুখ খান ‘দিলৱালে দুলহনিয়া লে জায়েংগে’ ৰ বাবে নিৰ্মাতাসকলৰ প্ৰথম পছন্দ নাছিল, আপুনি বিশ্বাস কৰিব নে? কিন্তু এই কথা সঁচা। শ্বাহৰুখ খানক নহয় ছবিখনত ‘ৰাজ’ৰ চৰিত্ৰটোৰ অফাৰ আন এজন অভিনেতাকহে দিয়া হৈছিল। কিন্তু সেই অভিনেতাজনে সেই প্ৰস্তাৱ নাকচ কৰিছিল।
আচলতে পৰিচালক আদিত্য চোপ্ৰাই ছেইফ আলী খানক ‘দিলৱালে দুলহনিয়া লে জায়েংগে’ ছবিত অভিনয়ৰ প্ৰস্তাৱ দিছিল। এই ছবিখনৰ ‘ৰাজ’ৰ চৰিত্ৰটো লণ্ডন ভিত্তিক হোৱাৰ বাবে ছেইফৰ কথা কোৱাৰ শৈলী আৰু উচ্চাৰণ উপযুক্ত বুলি বিবেচিত হৈছিল। কিন্তু সেই সময়ত আদিত্য চোপ্ৰাক দিবলৈ ছেইফৰ হাতত সময় নাছিল। সেয়েহে ছেইফ আলী খানে ‘দিলৱালে দুলহনিয়া লে জায়েংগে’ৰ প্ৰস্তাৱ নাকচ কৰিবলগীয়া হৈছিল।
যেতিয়া ছেইফ আলী খানে ছবিখনৰ প্ৰস্তাৱ নাকচ কৰিছিল তেতিয়া আদিত্য চোপ্ৰাই শ্বাহৰুখ খানক চুক্তিবদ্ধ কৰিছিল। শ্বাহৰুখ খানো এই ছবিখনত কাম কৰিবলৈ সাজু নাছিল কাৰণ তেওঁ খলনায়ক চৰিত্ৰত অভিনয় কৰি সুখী আছিল। শ্বাহৰুখে ‘বাজীগৰ’ আৰু ‘দৰ’ৰ দৰে ছুপাৰহিট ছবিত খলনায়কৰ চৰিত্ৰত অভিনয় কৰি জনপ্ৰিয় হৈ পৰিছিল। কিন্তু আদিত্য আৰু যশ চোপ্ৰাৰ বুজনিত তেওঁ ‘দিলৱালে দুলহনিয়া লে জায়েংগে’ত অভিনয় কৰাৰ সিদ্ধান্ত লয়। শ্বাহৰুখ খান ‘দিলৱালে দুলহনিয়া লে জায়েংগে’ত ‘ৰাজ’ হোৱাটো হয়তো ভাগ্যই বিচাৰিছিল। এই ছবিখনৰ পাছত শ্বাহৰুখ খানৰ জনপ্ৰিয়তা কোনটো স্তৰত উপনীত হ'ল, সেই কথা সকলোৱে জানে।
Continue Reading
