স্বামীৰ মৃত্যু হোৱা ভাবি ২২ বছৰ বিধৱা জীৱন কটালে পত্নীয়ে! যোগীৰ ৰূপত আহিল স্বামী..তাৰপাছত?

ডিজিটেল ডেস্কঃ সংসাৰক মায়াভৰা সংসাৰ বুলি কোৱা হয়। সঁচাকৈয়ে কেতিয়াবা এই সংসাৰত মায়াৰ খেল দেখিবলৈ পোৱা যায়। এগৰাকী মহিলাই এবছৰ, দুবছৰ নহয় ২২ বছৰ ধৰি বিধৱা জীৱন কটাইছিল। কিন্তু ২২ বছৰৰ পাছত হঠাতে ঘৰত আহি উপস্থিত হৈছিলহি তেওঁৰ মৰমৰ স্বামী। ২২ বছৰ আগতে মানুহজন হঠাতে নোহোৱা হৈছিল। বহু বাট চাই চাইয়ো তেওঁৰ কোনো সন্ধান নোলোৱাত পৰিয়ালৰ লোকে তেওঁক মৃত বুলি ভাবি লৈছিল। মৃত বুলি ভাবি থকা মানুহজন হঠাতে ঘৰলৈ উভতি অহাত পৰিয়ালৰ লগতে গোটেই গাওঁখনৰ লোকসকল আচৰিত হৈ পৰে। এই ঘটনাটো সংঘটিত হৈছে ঝাৰখণ্ড ৰাজ্যৰ গড়ৱা জিলাৰ কান্দিখণ্ডত। মানুহজনৰ নাম উদয় চাও। উদয়ে কান্দিখণ্ড নামৰ গাঁওখনত পত্নী আৰু দুই সন্তানৰ সৈতে বাস কৰিছিল। হঠাতে এদিন তেওঁৰ সাংসাৰিক জীৱনৰ প্ৰতি মোহভংগ ঘটিছিল আৰু পৰিয়ালৰ সদস্যসকলক নজনোৱাকৈ উদয়ে ঘৰৰ পৰা ওলাই গৈছিল। উদয় হঠাতে নোহোৱা হোৱাৰ পাছত উদয়ৰ পৰিয়ালৰ সদস্যসকলে তেওঁক বিচাৰি উলিয়াবলৈ যথেষ্ট চেষ্টা কৰিছিল কিন্তু বহুত অনুসন্ধান কৰাৰ পাছতো উদয়ৰ কোনো সন্ধান পোৱা নগ'ল। অৱশেষত উদয়ৰ পৰিয়ালৰ সদস্যসকলে তেওঁক মৃত বুলি ভাবিবলৈ বাধ্য হৈ পৰিছিল। পত্নীয়েও স্বামীৰ মৃত্যু ঘটা বুলি ভাবি ২২ বছৰ দিন ধৰি বিধৱা হৈ থাকিল। উদয়ৰ সন্তানেও প্ৰতি পদে পদে পিতৃহীনতাৰ অভাৱ বাৰুকৈয়ে অনুভৱ কৰিছিল। উদয়ে কিছুদিন পূৰ্বে যোগীৰ ছদ্মবেশত ভিক্ষা বিচাৰি তেওঁৰ গাওঁলৈ আহিছিল আৰু নিজৰ ঘৰলৈ গৈ তেওঁ পত্নীৰ পৰা ভিক্ষা বিচাৰিছিল।ভিক্ষা দিবলৈ গৈ পত্নীয়ে স্বামী উদয়ক লগালগ চিনি পাইছিল। উদয়ে বাৰে বাৰে অস্বীকাৰ কৰি থাকিল যে তেওঁ উদয় নহয়, কিন্তু তেওঁৰ পত্নীৰ সম্পূৰ্ণ বিশ্বাস আছিল যে সেই যোগী আন কোনো নহয়.. সেইজনেই তেওঁৰ স্বামী উদয় চাও। পত্নীয়ে এই খবৰ চিঞৰি চিঞৰি সকলোকে দিয়ে আৰু গাওঁবাসীও সেই স্থানত উপস্থিত হয়হি। সকলোৱে উদয়ক দেখি চিনি পায়। অৱশেষত যোগীজনে স্বীকাৰ কৰে যে হয় তেওঁ উদয় চাও হয়। তেওঁ ২২ বছৰ ধৰি যোগীৰ জীৱন কটাই আছে। কেতিয়াবা সাৰংগী বজাই বজাই মানুহৰ ঘৰে ঘৰে ভিক্ষা বিচাৰি যায়। উদয়ে গাঁওবাসীক কয় যে পত্নীৰ পৰা ভিক্ষা নোলোৱাকৈ তেওঁৰ যোগী জীৱন সাৰ্থক নহ'ব বুলি তেওঁ অনুভৱ কৰিছিল সেয়েহে পত্নীৰ পৰা ভিক্ষা লবলৈ তেওঁ গাওঁলৈ ঘূৰি আহিছে। তেওঁ কৈছিল যে ''মোৰ পত্নীৰ ভিক্ষা অবিহনে মই সিদ্ধি প্ৰাপ্ত কৰিব নোৱাৰো। গতিকে মোক ভিক্ষা দি মোৰ কৰ্তব্য পালন কৰিবলৈ দিয়ক।'' পৰিয়ালৰ লগতে গাঁৱৰ সকলো মানুহে তেওঁক যোগী জীৱন ত্যাগ কৰি ঘৰত থাকিবলৈ অনুৰোধ জনালে। গাঁওবাসীয়ে উদয়ক গাওঁ এৰি নাযাবলৈ আহ্বান জনাইছিল কিন্তু তেওঁ ঘৰত থাকিবলৈ অস্বীকাৰ কৰিলে। তেওঁ আনকি ভিক্ষা গ্ৰহণ কৰাৰ পাছত সেই গাঁওখনৰ পৰা ওলাই আহিছিল আৰু এখন কলেজত আশ্ৰয় লৈছিল। গাঁওখনৰ বহুলোকে তেওঁক যোগী জীৱন ত্যাগ কৰাবৰ বাবে চেষ্টা কৰি আছে। ইয়াৰ বাবে গাঁওখনৰ লোকসকলে বাবা গোৰখনাথৰ ধামত যজ্ঞ আৰু পূজা-সেৱা আগবঢ়াবলৈ ধন সংগ্ৰহ কৰিবলৈ একত্ৰিত হৈছে। সঁচাকৈয়ে উদয় চাও পুনৰ এজন সাধাৰণ মানুহ হৈ পৰিয়ালৰ মাজলৈ উভতি আহিবনে...সেই প্ৰশ্নই এতিয়া পৰিয়ালৰ লোকসকলৰ লগতে সমগ্ৰ গাঁওবাসীৰ মনত উদয় হৈছে। আৰু পঢ়কঃ শৈশৱতে হেৰুৱাইছিল দুয়োখন হাত,এতিয়া সাঁতোৰৰ ৰাষ্ট্ৰীয় চেম্পিয়ন এই কিশোৰ