ডিজিটেল ডেস্কঃ ভাৰতীয় পপ আইকন তথা জনপ্ৰিয় কণ্ঠশিল্পী ঊষা উত্থুপৰ স্বামী জানি চাকো উত্থুপৰ সোমবাৰে দেহাৱসান ঘটে। তেওঁৰ পৰিয়ালে কয় যে তেওঁ কলকাতাতে শেষ নিঃশ্বাস ত্যাগ কৰে। ঘৰত টিভি চাই থাকোঁতে হৃদযন্ত্ৰৰ সমস্যাত ভুগে ঊষা উত্থুপৰ স্বামী। তেওঁক ওচৰৰ চিকিৎসালয়লৈ লৈ যোৱা হয়, য’ত তেওঁক মৃত ঘোষণা কৰা হয়।
হৃদযন্ত্ৰৰ ক্ৰিয়া বন্ধ হোৱাৰ বাবে তেওঁৰ মৃত্যু হোৱা বুলি সদৰী কৰে চিকিৎসকে। জানি চাকো উত্থুপ উষা উত্থুপৰ দ্বিতীয় স্বামী আৰু তেওঁ চাহ খেতি উদ্যোগৰ সৈতে জড়িত আছিল। উষা আৰু জানিৰ প্ৰথম লগ হৈছিল ৭০ৰ দশকৰ আৰম্ভণিতে কলকাতাৰ আইকনিক ৰেষ্টুৰেণ্ট ট্ৰিংকেজত।
ঊষাৰ বাহিৰেও জানিয়ে দুটা সন্তান এৰি থৈ গৈছে। তেওঁৰ এজন পুত্ৰ আৰু এগৰাকী কন্যা আছে।
উল্লেখ্য যে চলিত বৰ্ষৰ আৰম্ভণিতে উষা উত্থুপক দেশৰ তৃতীয় সৰ্বোচ্চ অসামৰিক সন্মান পদ্মভূষণেৰে সন্মানিত কৰা হৈছিল। সংগীত জগতলৈ আগবঢ়োৱা অৱদানৰ বাবে তেওঁক এই সন্মান দিয়া হৈছিল।
ভাৰতৰ ৰাষ্ট্ৰপতি দ্ৰৌপদী মুৰ্মু, প্ৰধানমন্ত্ৰী নৰেন্দ্ৰ মোদী, উপ-ৰাষ্ট্ৰপতি জগদীপ ধনখৰ আৰু গৃহমন্ত্ৰী অমিত শ্বাহৰ উপস্থিতিত ৰাষ্ট্ৰপতি ভৱনত উষাক পদ্মভূষণ প্ৰদান কৰা হয়।
Continue Reading
