তামিলনাডুৰ নীলগিৰিলৈ কিয় গৈছিল বিপিন ৰাৱট?

ডিজিটেল ডেস্ক: আজি তামিলনাডুৰ কুনুৰত সংঘটিত এক হেলিকপ্টাৰ দুৰ্ঘটনাত সেনাপ্ৰধান বিপিন ৰাৱটকে ধৰি তেৰগৰাকীৰ মৃত্যুৰ খবৰে চাঞ্চল্যৰ সৃষ্টি কৰিছে৷ পিছে এইমুহূৰ্তত দেশবাসীৰ মনত দোলা দিছে এটি প্ৰশ্নই৷ আজি ক'লৈ গৈছিল বিপিন ৰাৱট? কি অনুষ্ঠানৰ বাবে বিপিন ৰাৱটে ঢাপলি মেলিছিল তামিলনাডুলৈ? জানিব পৰামতে, জেনেৰেল বিপিন ৰাৱটে আজি ষ্টাফ কোৰ্চৰ শিক্ষক আৰু ছাত্ৰবিষয়াসকলক সম্বোধন কৰিবলৈ ৱেলিংটনৰ প্ৰতিৰক্ষা সেৱা কৰ্মচাৰী মহাবিদ্যালয় (নীলগিৰি পাহাৰ) ভ্ৰমণলৈ গৈছিল।

আজি দুপৰীয়াৰ আশে-পাশে সেনাপ্ৰধানগৰাকী আৰু আন ৯ জন যাত্ৰীক কঢ়িয়াই নিয়া ৪ জন সদস্যৰ দলৰ সৈতে আইএএফ এমআই ১৭ ভি৫ হেলিকপ্টাৰ এখন টিএনৰ কুনুৰৰ ওচৰত এক শোকাৱহ দুৰ্ঘটনাত পতিত হয়। গভীৰ দুখৰ সৈতে এতিয়া নিশ্চিত কৰা হৈছে যে দুৰ্ভাগ্যজনক দুৰ্ঘটনাটোত জেনেৰেল বিপিন ৰাৱট, ৰাৱটপত্নী মধুলিকা ৰাৱট আৰু বিমানত থকা আন ১১গৰাকী ব্যক্তিৰ মৃত্যু হৈছে।

তামিলনাডুৰ কুনুৰত সংঘটিত হেলিকপ্টাৰ দুৰ্ঘটনাত আঘাতপ্ৰাপ্ত ডিএছএছচিৰ নিৰ্দেশক কৰ্মচাৰী গ্ৰুপ কেপ্টেইন বৰুণ সিং এছচি বৰ্তমান ৱেলিংটনৰ সামৰিক চিকিৎসালয়ত চিকিৎসাধীন হৈ আছে৷ ভাৰতীয় বায়ু সেনাই এক বিবৃতিযোগে এই তথ্য সদৰি কৰিছে৷ চিডিএছ ৰাৱট আৰু তেওঁৰ পত্নীৰ উপৰিও হেলিকপ্টাৰত থকাসকল আছিল ব্ৰিগেডিয়াৰ এলএছ লিডাৰ, লেফটেনেণ্ট কৰ্ণেল হৰজিন্দৰ সিং, এন কে গুৰসেৱক সিং, এন কে জিতেন্দ্ৰ কুমাৰ, এল/এন কে বিবেক কুমাৰ, এল/এন কে বি চাই তেজা আৰু হাভ সতপাল।