ডিজিটেল ডেস্ক : এক অসাধাৰণ পৰিত্ৰাণকাৰীৰ ৰূপত আত্মপ্ৰকাশ কৰিলে কেন্দ্ৰীয় ঔদ্যোগিক সুৰক্ষা বাহিনীৰ এগৰাকী জোৱানে৷ ঔদ্যোগিক সুৰক্ষা বাহিনীৰ তত্ত্বাৱধানত প্ৰসূতিয়ে জন্ম দিবলৈ সক্ষম হয় সন্তান৷ এই ঘটনা সংঘটিত হৈছে দিল্লীৰ আনন্দ বিহাৰ মেট্ৰ' ষ্টেচনত৷ বৃহস্পতিবাৰে সংঘটিত এই ঘটনাই বিভিন্নজনক কৰি তুলিছে আৱেগিক৷
উল্লেখ্য যে, কেন্দ্ৰীয় ঔদ্যোগিক সুৰক্ষা বাহিনীৰ (চিআইএছএফ) এগৰাকী মহিলা কনিষ্টবলে বৃহস্পতিবাৰে নতুন দিল্লীৰ আনন্দ বিহাৰ মেট্ৰ' ষ্টেচনৰ প্লেটফৰ্মত এগৰাকী গৰ্ভৱতী মহিলাক সন্তান প্ৰসৱত সহায় কৰে। কেন্দ্ৰীয় ঔদ্যোগিক সুৰক্ষা বাহিনীৰ তথ্য অনুসৰি, মহিলা যাত্ৰীগৰাকীয়ে মেট্ৰ' ষ্টেচনৰ প্লেটফৰ্ম-৩ত মেট্ৰ'ৰ বাবে অপেক্ষা কৰি থাকোঁতেই প্ৰসৱ বেদনাত আক্ৰান্ত হৈছিল৷ শ্বিফ্ট ইন-চাৰ্জৰ নিৰ্দেশত, চিআইএছএফৰ কনিষ্টবল অনামিকা কুমাৰীয়ে তৎক্ষণাৎ ঘটনাস্থলীত উপস্থিত হয় আৰু মহিলাগৰাকীক সহায় কৰিবলৈ তৎপৰ হৈ পৰে।
আন মহিলা যাত্ৰীসকলৰ সহায়ত, তেওঁ প্ৰসৱ বেদনাত ভুগি থকা মহিলাগৰাকীক প্লেটফৰ্মতে সন্তান প্ৰসৱ কৰাত সহায় কৰে৷ মহিলাগৰাকীৰ মৰ্যাদা তথা গোপনীয়তা ৰক্ষাৰ স্বাৰ্থত তেওঁৰ নাম লোৱাৰ পৰা বিৰত থাকে সুৰক্ষা বাহিনীটোৰ কৰ্তৃপক্ষ৷ পাছত কেন্দ্ৰীয় ঔদ্যোগিক সুৰক্ষা বাহিনীৰ সহযোগিতাত মহিলাগৰাকী আৰু নৱজাতকক এখন এম্বুলেন্সেৰে চিকিৎসালয়লৈ লৈ যোৱা হয়। তেওঁ আৰু তেওঁৰ স্বামীয়ে জৰুৰীকালীন অৱস্থাত সময়ত তৎক্ষণাৎ সঁহাৰি জনোৱা আৰু প্ৰয়োজনীয় সহায় আগবঢ়োৱাৰ বাবে চিআইএছএফ কৰ্মীসকলক ধন্যবাদ জনায়৷
Continue Reading
