তীব্ৰ সংঘাতত মুখ্যমন্ত্ৰী-ৰাজ্যপাল মমতাই ব্লক কৰিলে ধনখড়ৰ টুইটাৰ

ডিজিটেল ডেস্ক: দেশৰ ৰাজনীতিৰ ক্ষেত্ৰত এতিয়া মমতাৰ ৰাজনীতিয়ে সৃষ্টি কৰিছে তীব্ৰ জোকাৰণিৰ৷ সৃষ্টি কৰিছে সাংবিধানিক সংকটৰো৷ পশ্চিমবংগৰ মুখ্যমন্ত্ৰী মমতা বেনাৰ্জী আৰু ৰাজ্যপাল জগদীপ ধনখড়ৰ মাজৰ সংঘাতে এই মুহূৰ্তত গুৰুতৰ ৰূপ ধাৰণ কৰিছে৷ মুখ্যমন্ত্ৰী মমতা বেনাৰ্জীয়ে টুইটাৰত ৰাজ্যপাল জগদীপ ধনখড়ক আজি কিছুসময়ৰ পূৰ্বে ব্লক কৰিছে৷ এইক্ষেত্ৰত মুখ্যমন্ত্ৰী মমতাৰ অভিযোগ অনুসৰি ৰাজ্যপাল জগদীপ ধনখড়ে তেওঁৰ টেলিফোনিক টেপিং কৰিছে৷ মুখ্যমন্ত্ৰী আৰু ৰাজ্যপালৰ এই সংঘাতে দিল্লীতো প্ৰচণ্ড জোকাৰণিৰ সৃষ্টি কৰিছে৷ ফোন টেপিঙৰ উপৰি মমতাই ৰাজ্যপালগৰাকীৰ বিৰুদ্ধে মুখ্য সচিব আৰু ডিজিপিক ‘ভয়’ দেখুওৱাৰ অভিযোগো উত্থাপন কৰে। আজি এক সংবাদমেলত মুখ্যমন্ত্ৰী মমতাই কয় যে, ‘মই ইয়াৰ বাবে আগতীয়াকৈ ক্ষমা বিচাৰো। তেওঁ (জগদীপ ধনখড়) মোক বা মোৰ বিষয়াসকলক গালি-গালাজ কৰি প্ৰতিদিনে টুইট কৰে। অসাংবিধানিক, অনৈতিক কথা কয় ধনখড়ে। তেওঁ পৰামৰ্শ নিদিবলৈও নিৰ্দেশ দিয়ে। নিৰ্বাচিত চৰকাৰ এখনক বন্ধনযুক্ত শ্ৰমিকৰ দৰে ব্যৱহাৰ কৰে। সেইকাৰণে মই তেওঁক মোৰ টুইটাৰ একাউণ্টত ব্লক কৰিছো। মই বিৰক্ত হৈ পৰিছিলো।’ মমতা বেনাৰ্জীৰ এই পদক্ষেপৰ পাছত ৰাজ্যপালৰ পোষ্টসমূহ তেওঁৰ টুইটাৰ ফীডত আৰু প্ৰদৰ্শিত নহ’ব৷ শেহতীয়াকৈ মহাত্মা গান্ধীৰ মৃত্যু বাৰ্ষিকী উপলক্ষে আয়োজিত এক অনুষ্ঠানত ধনখড়ে তেওঁৰ চৰকাৰৰ ওপৰত আক্ৰমণ কৰা দেখা গৈছিল। মমতাই লগতে কয় যে তেওঁ প্ৰধানমন্ত্ৰী নৰেন্দ্ৰ মোদীলৈ ধনখড়ক অপসাৰণ বিচাৰি কেইবাবাৰো পত্ৰ প্ৰেৰণ কৰিছে যদিও কোনো ব্যৱস্থা লোৱা হোৱা নাই।