ডিজিটেল ডেস্কঃ ফেশ্বন উদ্যোগৰ এক সুপৰিচিত নাম ছায়েছা শ্বিণ্ডে। ছায়েছা ছ’চিয়েল মিডিয়াত অতি সক্ৰিয় হৈ থাকে। ছায়েছা শ্বিণ্ডে এগৰাকী ট্ৰেন্স ৱ’মেন। তেওঁ প্ৰথমে এগৰাকী পুৰুষ আছিল। পুৰুষৰ পৰা নিজকে তেওঁ মহিলালৈ ৰূপান্তৰ কৰে। পুৰুষ হৈ থাকোতে তেওঁৰ নাম আছিল স্বপ্নীল শ্বিণ্ডে।ট্ৰেন্স ৱ’মেন ছায়েছাই ছ’চিয়েল মিডিয়াত তেওঁৰ লগত ঘটা বাস্তৱ ঘটনাৰ কথা উল্লেখ কৰি থাকে। শেহতীয়াকৈ তেওঁ মুকেশ আম্বানী পৰিয়ালৰ এটা পাৰ্টিত অংশ লৈছিল আৰু তাত তেওঁৰ লগত কি হৈছিল সেই কথাও ছ’চিয়েল মিডিয়াত সদৰী কৰিছে।
সেই পাৰ্টিলৈ এযোৰ সেউজীয়া সাজ পৰিধান কৰি গৈছিল ছায়েছাই। ছায়েছাই কয় যে এইটো এটা অতি বিশেষ অনুষ্ঠান আছিল। এই অনুষ্ঠানটো মোৰ বাবে প্ৰথম আছিল য’ত মই অকলে গৈছিলো। মই অলপ অপ্ৰস্তুত হৈছিলো আৰু ৰেড কাৰ্পেটত ভৰি দিয়াৰ সময়তে পাপাৰাজীৰ ফুচফুচানি শুনিবলৈ পাইছিলো। এজনে কৈছিল,"কোনোবা মল্লযুঁজাৰু আহি আছে"। অৱশ্যে কিছু সময়ৰ পাছত তেওঁ মোক চিনি পাইছিল। ছায়েছাই কয় যে ''তেওঁ মোক চিনি পালেও, কিন্তু সেই এটা মুহূৰ্তই মোক মোৰ শৰীৰৰ প্ৰতি বহুত সতৰ্ক কৰি তুলিছিল। শৰীৰ মোৰ বাবে সদায় এটা সমস্যা হৈ আহিছে।''
এই পষ্টৰ সন্দৰ্ভত নেটিজেনসকলে ছায়েছাক সমৰ্থন আগবঢ়ায়। তেওঁলোকে কয় যে নিজে যেনেকুৱা তেনেকুৱাকৈয়ে গ্ৰহণ কৰাটো উচিত আৰু বেলেগৰ কথাত ধ্যান নিদি আগুৱাই যোৱাত গুৰুত্ব দিব লাগে।
উল্লেখ্য যে এতিয়ালৈকে ছায়েছা শ্বিণ্ডেই অগণন চেলিব্ৰিটিৰ বাবে সাজ-পোছাক ডিজাইন কৰিছে। মিছ ইউনিভাৰ্ছ প্ৰতিযোগিতাত হৰনাজ সান্ধুৱে পিন্ধা গাউনটো তেওঁৱেই ডিজাইন কৰিছিল। মাধুৰী দিক্ষীত, দীপিকা পাডুকন, কৰীনা কাপুৰ, তাপসী পান্নু, শ্ৰদ্ধা কাপুৰ, প্ৰিয়ংকা চোপ্ৰা আদি চেলিব্ৰিটিৰ সৈতে কাম কৰিছে ছায়েছাই। 
Continue Reading
