ডিজিটেল ডেস্কঃ যদি আপোনাৰ টেটুৰ প্ৰতি আসক্তি আছে তেন্তে এই খবৰটো আপোনাৰ বাবে বিশেষ হব। কাৰণ টেটু বনাবলৈ আপোনাৰ মনত থকা চখটোৱে আপোনাৰ জীৱনৰ প্ৰতি ভাবুকি কঢ়িয়াই আনিব পাৰে। বাৰাণসীৰ ১৪ জন লোকৰ ক্ষেত্ৰত ঘটিছে অঘটন। দৰাচলতে বাৰাণসীত সস্তীয়া টেটু বনাই ১৪ জন লোক গুৰুতৰভাৱে অসুস্থ হৈ পৰিছে। ইয়াৰ পিছতে কৰ্তৃপক্ষই সস্তীয়া টেটু পাৰ্লাৰলৈ যোৱাৰ সতৰ্কবাণী জাৰি কৰিবলগীয়া হৈছে।
সংবাদ মাধ্যমৰ সৈতে হোৱা কথা-বতৰাত বাৰাণসীৰ পণ্ডিত দীনদয়াল উপাধ্যায় হাস্পতালৰ ডাঃ প্ৰীতি আগৰৱালাই কয় যে ৰোগী সকলক পুংখানুপুংখভাৱে পৰীক্ষা কৰা হৈছে। তেওঁলোকৰ দেহত পোৱা গৈছিল এইচআইভিৰ বীজাণু। তদন্তত ধৰা পৰিছে যে বহু এইচআইভি আক্ৰান্ত ৰোগীয়ে স্থানীয় সস্তীয়া টেটু পাৰ্লাৰৰ পৰা টেটু কৰাইছিল। টেটু কৰাৰ পিছত তেওঁলোকৰ স্বাস্থ্যৰ অৱনতি ঘটিবলৈ ধৰে। তেওঁ কয় যে এই সন্দৰ্ভত অধিক তদন্ত চলি আছে।
টেটু কৰি মানুহ অসুস্থ হৈ পৰাৰ খবৰটো বিয়পি পৰিল বৰগাঁৱৰ এগৰাকী ২০ বছৰীয়া যুৱক আৰু নাগমাৰ এগৰাকী ২৫ বছৰীয়া যুৱতী অসুস্থ হৈ পৰাত। সূত্ৰ অনুসৰি ভাইৰেল টাইফয়েড, মেলেৰিয়াকে ধৰি ৰোগীসকলৰ ওপৰত বহু পৰীক্ষা কৰা হৈছিল। সকলো চেষ্টা কৰিও যেতিয়া ৰোগীৰ জ্বৰ কমি নাহিল, তেতিয়া তেওঁলোকৰ এইচআইভি পৰীক্ষা কৰা হ’ল। এই পৰীক্ষাত সকলো ৰোগীৰ এইচআইভি পজিটিভ পোৱা গৈছিল।
পৰীক্ষা কৰিলে দেখা গ’ল যে এই এইচআইভি পজিটিভ ৰোগীসকলৰ কোনো এজনৰেই শাৰীৰিক সংস্পৰ্শৰ বাবে বা বেজী বা তেজৰ সংক্ৰমণৰ বাবে এই সংক্ৰমণ হোৱা নাছিল। পৰীক্ষাত ধৰা পৰে যে শেহতীয়াকৈ সকলো ৰোগীয়ে টেটু বনাইছিল। এই বিষয়টোৰ মূল কথাটোলৈ আহিবলৈ যেতিয়া অধিক তদন্ত কৰা হ’ল, তেতিয়া দেখা গ’ল যে তেওঁলোক সকলোৱে একেজন ব্যক্তিৰ পৰাই টেটুটো বনাইছিল।
Continue Reading
