ডিজিটেল ডেস্কঃ লিফ্টত কেতিয়াবা কিছুমান অঘটন ঘটা আমি শুনিবলৈ পাওঁ। শেহতীয়াকৈ এক চাঞ্চল্যকৰ ঘটনা পোহৰলৈ আহিছে। লিফ্টৰ ভিতৰত তিনিদিন ধৰি আৱদ্ধ হৈ থাকিল এগৰাকী মহিলা। অৱশেষত তেওঁ সাবটিলে মৃত্যুক। এই ভয়ংকৰ ঘটনা সংঘটিত হৈছে উজবেকিস্তানৰ ৰাজধানী তাছকেন্দত। ৩২ বছৰীয়া মহিলাগৰাকীয়ে সহায়ৰ বাবে চিঞৰি থাকিল যদিও সেই চিঞৰ গৈ কাৰো কাণত নপৰিল। অৱশেষত লিফ্টৰ ভিতৰতে তেওঁৰ মৃত্যু হয়।
মৃত মহিলাগৰাকীৰ নাম অলগা লিঅ’নটিভা। ৯ মহলীয়া অট্টালিকাটোৰ ওপৰৰ মহলাৰ লিফ্টত আবদ্ধ হৈ পৰিছিল লিঅ’নটিভা। য’ত তেওঁ কোনো ধৰণৰ সহায় লাভ কৰিব পৰা নাছিল। খবৰ অনুসৰি বিদ্যুৎ সংযোগ বিচিন্ন হোৱাৰ বাবে লিফ্টখন ৯ নং মহলাত আবদ্ধ হৈ পৰে। এই সময়ছোৱাত লিঅ’নটিভা লিফ্টত অকলে আছিল।
তিনিটা সন্তানৰ মাতৃ ৩২ বছৰীয়া অলগা লিঅ’ন্টিয়েভাই ডেলিভাৰী লেডী হিচাপে কাম কৰিছিল। প্ৰতিদিনৰ দৰেই সেইদিনাও তেওঁ কামলৈ গৈছিল যদিও গভীৰ নিশালৈকে ঘৰলৈ উভতি নাহিলত পৰিয়ালৰ লোকে আৰক্ষী থানাত নিৰুদ্দেশৰ অভিযোগ দাখিল কৰে। ইয়াৰ পাছতে নিৰুদ্দেশ হোৱা মহিলাগৰাকীৰ সন্ধান আৰম্ভ হয়। তদন্তৰ অন্তত লিফ্টত মহিলাগৰাকীৰ মৃতদেহ উদ্ধাৰ কৰে।
এই বিষয়ত কৰ্তৃপক্ষই তদন্ত আৰম্ভ কৰিছে। তদন্তত দেখা গৈছে যে যিখন লিফ্টত মহিলাগৰাকীয়ে আবদ্ধ হৈ মৃত্যুবৰণ কৰিছিল, সেইখন চীনত নিৰ্মিত ৰানিং লিফ্ট আছিল। অৱশ্যে পঞ্জীয়ন হোৱা নাছিল। বৰ্তমান বিল্ডিং কৰ্তৃপক্ষৰ বিৰুদ্ধে গোচৰ ৰুজু কৰা হৈছে। তদন্তত দেখা গৈছে যে লিফ্টখনত বহু সমস্যা আছিল যদিও সেইবোৰ শুধৰোৱা হোৱা নাছিল। ইয়াক গুৰুতৰ গাফিলতিৰ ঘটনা বুলি গণ্য কৰা হৈছে।
Continue Reading
