তল পৰিল ঘটনা,হিমাচললৈ ৰাওনা; ‘মা’ৰ শৰণাপন্ন শিল্পা-ৰাজ কুন্দ্ৰা

নতুন দিল্লীঃ বলীউড এৰিনাত বহু দম্পতীয়ে অনুৰাগীৰ দৃষ্টি আকৰ্ষণ কৰিবলৈ সক্ষম হৈছে। তেওঁলোকক কেন্দ্ৰ কৰি সময়ে সময়ে নানা মুখৰোচক কথাৰ ৰোল উঠাও দেখা যায়। বলীউডত এয়া কোনো নতুন কথা নহয়। তেনে দম্পতীৰ ভিতৰত লেখত ল’বলগীয়া হৈছে শিল্পা-ৰাজৰ যুগলবন্দী। শিল্পা-ৰাজৰ স্নিগ্ধ প্ৰেম সৰ্বজন বিদিত। সকলো ঠিকেই চলি আছিল। ইয়াৰ মাজতে বিনা মেঘে যেন বজ্ৰপাতহে পৰিল শিল্পাৰ সুখৰ সংসাৰত। পৰ্ণগ্ৰাফীৰ গোচৰত অভিযুক্ত বুলি আৰক্ষীৰ কোপ দৃষ্টি পৰিছিল স্বামী ৰাজ কুন্দ্ৰাৰ ওপৰত। সেই গ্লানিৰ ছিটিকনি পৰিছিল শিল্পাৰ গাতো। সামাজিক মাধ্যমত শিল্পাই কেইবাটাও প’ষ্টেৰে বিষন্ন সময়ৰ দিনিলিপিৰ বিষয়ে অৱগত কৰিছিল অনুৰাগীক। বহু প্ৰতীক্ষাৰ অন্তত হেৰুৱা হাঁহি উভতাই পাইছিল শিল্পাই। এইবাৰ শিল্পা-ৰাজৰ আন এক খবৰেহে সংবাদ শিৰোনাম দখল কৰা পৰিলক্ষিত হৈছে। ৰাজ কুন্দ্ৰাই জামিন পোৱাৰ পাছত ৰাজহুৱাভাৱে দীৰ্ঘদিন ওলাই অহা নাছিল তেওঁ। প্ৰায় দুমাহ ধৰি লোকচক্ষুৰ আঁৰত আছিল ৰাজ কুন্দ্ৰা।

বিতৰ্কৰ পৰা হাত সাৰিবলৈ সামাজিক মাধ্যমৰ একাউণ্টো ডিলিট কৰিছিল ৰাজ কুন্দ্ৰাই। ইয়াৰ মাজতে শেহতীয়াকৈ শিল্পা ছেট্টীৰ হিমাচল ট্ৰিপ ভাইৰেল হৈ পৰিছে। সামাজিক মাধ্যমতো জেলৰ পৰা মুকলি হৈ অহাৰ পাছত স্বামীৰ সৈতে শিল্পাৰ প্ৰথম ৰাজহুৱা ভ্ৰমণৰ ফটোবোৰ সৰ্বত্ৰে লাভ কৰিছে চৰ্চা। ছবিখনত শিল্পাই স্বামী ৰাজকুন্দ্ৰাৰ হাতত ধৰি হিমাচলৰ জ্বালাজী দেৱী আৰু মা চামুণ্ডা দেৱী মন্দিৰত প্ৰাৰ্থনা কৰা দেখা গৈছে। পতি-পত্নীৰ একে পোছাকেও সামাজিক মাধ্যমত লাভ কৰিছে ব্যাপক চৰ্চা। উল্লেখ্য যে, পৰ্ণগ্ৰাফীৰ গোচৰত ৰাজ কুন্দ্ৰাক ১৯ জুলাইত মুম্বাই আৰক্ষীয়ে গ্ৰেপ্তাৰ কৰিছিল। পৰ্ণ ছবি নিৰ্মাণ আৰু ইয়াক বিভিন্ন মাধম্যত প্ৰচাৰ কৰা বুলি ৰাজ কুন্দ্ৰাৰ বিৰুদ্ধে অভিযোগ উত্থাপিত হৈছিল। তাৰ পাছত ১৫ ছেপ্টেম্বৰত মুম্বাই দণ্ডাধীশৰ আদালতত ৰাজৰ বিৰুদ্ধে ১৫০০ পৃষ্ঠাৰ পৰিপূৰক অভিযোগপত্ৰ দাখিল কৰিছিল মুম্বাই আৰক্ষীয়ে। ৰাজ কুন্দ্ৰাই জামিন বিচাৰি ১৮ ছেপ্টেম্বৰত মহাৰাষ্ট্ৰৰ আদালতত আবেদন কৰিছিল। ৰুজু হোৱা গোচৰটোত ৰাজৰ বিৰুদ্ধে কোনো আৰক্ষীৰ ওচৰত কোনো প্ৰামাণিক তথ্য নাই বুলি ৰাজকুন্দ্ৰাৰ ব্যক্তিগত অধিবক্তাই দাবীও কৰিছিল।অৱশেষত, ২০ ছেপ্টেম্বৰত ৫০,০০০ টকাৰ ব্যক্তিগত বণ্ডত জামিন পাইছিল ৰাজ কুন্দ্ৰাই।