তৃণমূল কংগ্ৰেছ ত্যাগ , জাতীয় কংগ্ৰেছলৈ প্ৰত্যাৱৰ্তন ৰিপুন বৰাৰ

সময় আৰু ৰাইজৰ আহ্বান মৰ্মে  পুনৰ পুৰণি ঘৰখনলৈ ঘূৰি অহাৰ সিদ্ধান্ত লোৱা বুলি সদৰি কৰি তৃণমূল কংগ্ৰেছ ত্যাগ কৰাৰ  পাছত পুনৰ অসম প্ৰদেশ কংগ্ৰেছত যোগদান কৰে একালৰ দলটোৰ সভাপতি ৰিপুণ বৰাই । অসম প্ৰদেশ কংগ্ৰেছ কমিটীৰ এদিনীয়া কাৰ্যসূচীৰে  আজি মথুৰাপুৰত অনুষ্ঠিত হোৱা বৰ্ধিত কাৰ্যনিৰ্বাহক সভাত   

 এ-আই-চি-চিৰ সম্পাদক জিতেন্দ্ৰ সিঙৰ উপৰিও অসম প্ৰদেশ কংগ্ৰেছৰ সভাপতি  ভূপেন বড়া, সাংসদ গৌৰৱ গগৈ, প্ৰদ্যুৎ বৰদলৈ, আৰু বিৰোধী দলপতি দেবব্ৰত শইকীয়াৰ উপস্থিতিত আজি কংগ্ৰেছ দলত আনুষ্ঠানিকভাৱে যোগদান  কৰে ৰিপুন বৰুৱাই । 

সংবাদ মাধ্যমেৰে হোৱা কথা-বাৰ্তাত ৰিপুণ বৰাই কয় 'মোৰ পুৰণি ঘৰখনৰ পৰা যি কাৰণতে নহওক কিয়, প্ৰায় আঢ়ৈ বছৰ আঁতৰি আছিলো । কিন্তু  বৰ্তমান সময়ৰ আহ্বান যে  অসম তথা ভাৰতবৰ্ষত  ফেচীবাদী, সাম্প্ৰদায়িকতাবাদী, জনবিৰোধী, দুৰ্নীতিগ্ৰস্ত বিজেপিক উৎখাত কৰাৰ সময় আহি পৰিছে।' বৰাই লগতে কয়  'শেহতীয়া লোকসভা নিৰ্বাচনৰ  'মুড অব্‌ দ্য নেচনে' প্ৰমাণ কৰিছে যে ভাৰতবৰ্ষত বিজেপিক উৎখাত কৰিবলৈ হ'লে যি ৰাজ্যত যি বিৰোধী দল শক্তিশালী সেইৰাজ্যত সেই বিৰোধী দল শক্তিশালী কৰিব লাগিব।' সেয়ে ৰাইজ তথা সময়ৰ আহ্বান, অসমত কেৱল কংগ্ৰেছেহে বিজেপিক উৎখাত কৰিব পাৰিব বুলি  মন্তব্য কৰি  কয় যে বিজেপিক অসমৰ পৰা উৎখাত কৰিবলৈ হ'লে কংগ্ৰেছ দলক শক্তিশালী কৰিবই লাগিব। সেয়ে তৃণমূল কংগ্ৰেছৰ সৈতে থাকি বিজেপিৰ বিৰুদ্ধে মূল যুঁজখন চলাই নিয়া মানে বিৰোধীৰ ভোট বিভাজনহে কৰা বুলি অনুভৱ কৰি এনে প্ৰেক্ষাপটত অসমৰ ৰাইজৰ সুৰক্ষাৰ স্বাৰ্থত তৃণমূল কংগ্ৰেছ ত্যাগ কৰি  পুৰণি ঘৰ কংগ্ৰেছ দললৈ ঘূৰি অহা বুলি মন্তব্য কৰে । 

ইয়াৰ আগেয়ে ৰিপুণ বৰাক এ আই চি চিৰ সাধাৰণ সম্পাদক জিতেন্দ্ৰ সিঙে গামোচা,চেলেং আৰু জাপিৰে কংগ্ৰেছ দললৈ আদৰণি জনায় । দলত যোগদান কৰি  ৰিপুণ বৰাই কয় 'সময়ৰ আহ্বান মৰ্মে পুনৰ পুৰণি ঘৰলৈ ঘূৰি আহিছোঁ'