ডিজিটেল ডেস্ক: উচ্চতম ন্যায়ালয়ে যোগগুৰু বাবা ৰাম দেৱৰ পতঞ্জলিক এলোপেথিক ঔষধৰ ওপৰত বিভ্ৰান্তিকৰ বিজ্ঞাপনৰ বাবে তীব্ৰ ভৰ্ৎসনা কৰিছে।
ন্যায়াধীশ আহছানুদ্দিন আমানুল্লাহ আৰু প্ৰশান্ত কুমাৰ মিশ্ৰৰ বিচাৰপীঠে পতঞ্জলিলৈ জাননী জাৰি কৰি কয়, যদি তেওঁলোকৰ সামগ্ৰীৰ বিষয়ে একেধৰণৰ বিভ্ৰান্তিকৰ বিজ্ঞাপনৰ প্ৰচাৰ অব্যাহত থাকে তেন্তে তেওঁলোকে ১ কোটি টকাৰ জৰিমনা ভৰিব পাৰে।
ইয়াৰ লগতে ন্যায়ালয়ে পতঞ্জলি আয়ুৰ্বেদক অনাগত দিনত এনেধৰণৰ বিভ্ৰান্তিকৰ বিজ্ঞাপন প্ৰকাশ কৰাৰ পৰা বিৰত থাকিবলৈ পৰামৰ্শ দিছে। সৰ্বোচ্চ ন্যায়ালয়ে কয়, পতঞ্জলিয়ে নিশ্চিত কৰিব লাগে যে সংবাদ মাধ্যমত এনেধৰণৰ বিজ্ঞাপন দিয়াৰ পৰা যাতে প্ৰতিষ্ঠানটো বিৰত থাকে।
আদালতে নিৰ্দেশ দি কয় যে পতঞ্জলি আয়ুৰ্বেদে অনাগত দিনত এনেধৰণৰ কোনো বিজ্ঞাপন প্ৰকাশ নকৰিব আৰু লগতে নিশ্চিত কৰিব যে সংবাদ মাধ্যমত এনেধৰণৰ নৈমিত্তিক বিজ্ঞাপন প্ৰচাৰ নকৰিব৷ ইয়াৰ লগতে, এই বিষয়টোক লৈ ‘এলোপেথি বনাম আয়ুৰ্বেদ’ জাতীয় বিতৰ্ক নকৰিবলৈও কঠোৰ নিৰ্দেশনা প্ৰদান কৰিছে উচ্চতম ন্যায়ালয়ে৷
উল্লেখযোগ্য যে উচ্চতম ন্যায়ালয়ে ভাৰতীয় চিকিৎসা সংস্থাৰ দ্বাৰা দাখিল কৰা এখন আবেদনৰ ওপৰত এই নিৰ্দেশনা প্ৰদান কৰিছে। এই আৱেদনত কোৱা হৈছিল যে পতঞ্জলিৰ বিভ্ৰান্তিকৰ বিজ্ঞাপনৰ বাবে এলোপেথি ঔষধবোৰক অৱহেলা কৰা হৈছে।
Continue Reading
