ডিজিটেল ডেস্ক: আজিৰে পৰা বাৰানসী জিলা ন্যায়ালয়ে পুনৰ শুনানি আৰম্ভ কৰিব জ্ঞানৱাপী মহ্জিদৰ গোচৰ৷ কাশী-বিশ্বনাথ জ্ঞানৱাপী মছজিদৰ অন্তৰ্গত শ্ৰীনগৰ গৌৰী স্থলত পূজা কৰিবলৈ পাঁচগৰাকী হিন্দু মহিলাই অনুমতি বিচৰা সম্পৰ্কত আজি ন্যায়ালয়ে শুনানি গ্ৰহণ কৰিব৷
যোৱা মংগলবাৰে মুছলমান পক্ষই আদালতত যুক্তি প্ৰদৰ্শন কৰিছিল৷ বুধবাৰে হিন্দু পক্ষৰ অধিবক্তা বিষ্ণু শংকৰ জৈনে আদালতত গোচৰটোৰ সৈতে সংগতি ৰাখি “স্বাধীনভাৱে পূজা-অৰ্চনা কৰাৰ অধিকাৰ” সম্পৰ্কীয় এটি পুৰণি গোচৰৰ কথা অৱতাৰণা কৰে৷
আজি দিনৰ দুই বজাত এই গোচৰৰ পুনৰ শুনানি আৰম্ভ হ’ব আৰু হিন্দু পক্ষই নিজৰ যুক্তি প্ৰদৰ্শন কৰিব বুলি জানিব পৰা গৈছে৷
উল্লেখ্য যে, কিছুদিন পূৰ্বে মহজিদৰ চৌহদত শিৱলিংগ সদৃশ এটি আকৃতি উদ্ধাৰ হৈছিল৷ কিন্তু মহজিদৰ কৰ্তৃপক্ষই সেইয়া শিৱলিংগ নহয়, এক পানীৰ ফোৱাৰা বুলি মন্তব্য কৰিছিল।
গোচৰটো সম্পৰ্কত হিন্দু পক্ষটোয়ে দাবী কৰে যে পূৰ্বতে এই স্থান হিন্দুৰহে আছিল৷ এই দাবীক সত্য প্ৰমাণ কৰিবলৈ তেওঁলোকে আদালতত মহজিদৰ চৌহদত থকা শংখ, চক্ৰ, ত্ৰিশূল, আৰু পদুমফুল আদিৰ কথাও অৱতাৰণা কৰে৷
জানিব পৰা মতে এই শিৱলিংগক লৈ বিতৰ্ক আৰম্ভ হোৱাৰ পিছতেই উচ্চতম ন্যায়ালয়ে বাৰানসী জিলা অধিকাৰীক মুছলমান সকলৰ ধৰ্মীয় অনুভূতিত আঘাত নলগাকৈ সেই স্থানৰ সুৰক্ষা নিশ্চিত কৰিবলৈ নিৰ্দেশ দিছিল।
(প্ৰতিবেদন যুগুতালে লিজা বৰাই)
Continue Reading
