ডিজিটেল ডেস্ক: আসন্ন জম্মু-কাশ্মীৰ কেন্দ্ৰীয়শাসিত অঞ্চলৰ বিধানসভা নিৰ্বাচন৷ বিধানসভা নিৰ্বাচনৰ পূৰ্বে তীব্ৰতৰ হৈ পৰিছে নিৰাপত্তা বাহিনী আৰু সন্ত্ৰাসবাদীৰ মাজৰ তিক্ততা৷ জম্মু-কাশ্মীৰত নিৰাপত্তা বাহিনীয়ে বিগত তিনিমাহ ধৰি কঠোৰভাৱে সন্ত্ৰাসবাদ বিৰোধী অভিযান চলাই আহিছে।নিৰাপত্তা বাহিনীয়ে বিধানসভা নিৰ্বাচনৰ পূৰ্বে ঘোষণা কৰিছে হাই এলাৰ্ট। ইয়াৰ মাজতে জম্মু-কাশ্মীৰত আজি এক সন্ত্ৰাসবাদী আক্ৰমণৰ ঘটনা সংঘটিত হোৱৰ খবৰ পোহৰলৈ আহিছে ৷
প্ৰাপ্ত তথ্য অনুসৰি জম্মু-কাশ্মীৰৰ জম্মু দৰবাৰৰ সমীপৰ সুঞ্জৱান সেনা ছাউনীত সংঘটিত হৈছে সন্ত্ৰাসবাদী আক্ৰমণ৷ সেনা ছাউনীটোৰ
৩৬ নং ইনফ্ৰেণ্ট্ৰি ব্ৰিগেডৰ দ্বাৰা পৰিচালিত চেণ্ট্ৰি পোষ্ট এলেকাৰ সমীপত এই আক্ৰমণ সংঘটিত হৈছে৷ এই আক্ৰমণত আহত হৈছে এজন সেনা জোৱান৷ সূ্ত্ৰৰ তথ্য অনুসৰি এলেকাটোত সন্ত্ৰাসবাদ বিৰোধী অভিযান আৰম্ভ কৰা হৈছে বুলি জানিব পৰা গৈছে৷
উল্লেখযোগ্য যে যোৱা সপ্তাহত ভাৰতৰ নিৰাপত্তাৰক্ষীয়ে জম্মু-কাশ্মীৰৰ বান্দিপোৰা জিলাৰ গুৰেজ ছেক্টৰত নিয়ন্ত্ৰণ ৰেখাৰ(Line of Control) সমীপত অনুপ্ৰৱেশৰ চেষ্টাচলোৱা সন্ত্ৰাসবাদীৰ গোটক প্ৰতিহত কৰে৷ জম্মু-কাশ্মীৰৰ কুপৱাৰা জিলাৰ নিয়ন্ত্ৰণ ৰেখাৰ সমীপত হোৱা দুটা পৃথক এনকাউণ্টাৰত কমেও তিনিজন সন্ত্ৰাসবাদী নিহত হয়।
কেন্দ্ৰীয়শাসিত অঞ্চলটোত ১৮ ছেপ্টেম্বৰ, ২৫ ছেপ্টেম্বৰ আৰু ১ অক্টোবৰত তিনিটা পৰ্যায়ত অনুষ্ঠিত হ’বলগীয়া বিধানসভা নিৰ্বাচনৰ পূৰ্বে নিৰাপত্তাবাহিনী আৰু সন্ত্ৰাসবাদীৰ মাজৰ উত্তেজনা তীব্ৰতৰ হৈ পৰাত পৰিস্থিতি নিয়ন্ত্ৰণত ৰাখিবৰ বাবে জম্মু-কাশ্মীৰত নিৰ্বাচনী কৰ্তব্যৰ বাবে অৰ্ধসামৰিক বাহিনীৰ প্ৰায় ৩০০ কোম্পানীক নিয়োগ কৰা হৈছে বুলি জানিব পৰা গৈছে৷
Continue Reading
