ঢেকিয়াজুলি : ভাদমাহত হৰি নামৰ ধ্বনিৰে মুখৰিত হয় নামঘৰৰ বাকৰি৷ অসমীয়াই ভক্তিৰসত বিলীন হয় এই পৱিত্ৰ ভাদ মাহত। ভক্তিৰসৰ সাগৰ বৈ যায় এই মাহটোত। হৰি-বন্দনাৰে মুখৰিত হৈ পৰে অসমীয়া জাতীয় সংস্কৃতিৰ যাদুঘৰস্বৰূপ নামঘৰ। কাহিলিপুৱাতে হালখন লৈ পথাৰলৈ যোৱা কৃষকজন, বেলি ওলোৱাৰ লগে লগে মুখত কিবা অলপ ভৰাই চহৰৰ বজাৰলৈ যোৱা ক্ষুদ্ৰ ব্যৱসায়ীজন— গধূলি এপাক নামঘৰলৈ যাবলৈ কোনেও নাপাহৰে। প্ৰায় সমগ্ৰ মাহজুৰি ৰাজ্যত নাম-প্ৰসংগ চলে।
এই পবিত্ৰ ভাদমহীয়া নামপ্ৰসংগত ভাগ লৈ সৰ্বত্ৰে প্ৰশংসা বুটলিবলৈ সক্ষম হৈছে কেন্ত্ৰীয় মন্ত্ৰী এগৰাকীয়ে৷ ভাদমহীয়া নামত অংশ লৈছে কেন্দ্ৰীয় জলশক্তি দপ্তৰৰ মন্ত্ৰী গজেন্দ্ৰ সিং শ্বেখাৱটে৷ ঢেকীয়জুলিৰ এটা নামঘৰত কেন্দ্ৰীয় মন্ত্ৰীগৰাকীয়ে অংশ লৈ অসমীয়াৰ হৃদয় জিনিবলৈ সক্ষম হয়৷ ইপিনে অসমৰ নামঘৰৰ পৰিৱেশত মুগ্ধ হয় শ্বেখাৱট৷ ভকতৰ সৈতে নামত অংশ ল’লে মন্ত্ৰীজনে৷ মন্ত্ৰীজনক সংগ দিয়ে মন্ত্ৰী অশোক সিংঘল, কামাখ্য তাছাই৷
