'ভাল ল'ৰাই মাকক আমনি নকৰে'; সদ্যজাত শিশুক বুজনি চিকিৎসকৰ, ভিডিঅ' ভাইৰেল

ডি়জিটেল ডেস্কঃ কিছুমান ভিডিঅ'ই মানুহৰ হৃদয়স্পৰ্শ কৰি যায়। সিঁচি যায় সুখানুভূতি। মাত্ৰ কেইছেকেণ্ডমানৰ এটা ভিডিঅ'ই সকলোৰে অন্তৰ জয় কৰিছে। ভিডিঅ'টোত দেখা গৈছে এটা সদ্যজাত দেৱশিশু আৰু এগৰাকী মহিলা চিকিৎসক। কোনো এখন হাস্পতালৰ ভিতৰত মহিলা চিকিৎসকগৰাকীৰ কোলাত দেখা গৈছে সদ্যজাত দেৱ শিশুটিক। মহিলা চিকিৎসকগৰাকীয়ে সদ্যজাত শিশুটিৰ সৈতে খুব মন দি কথা পাতিছে। শিশুটিয়েও যেন মন দি শুনিছে চিকিৎসকগৰাকীয়ে কৈ যোৱা প্ৰতিটো কথা। কোনো আমনি নাই, কোনো কান্দোন নাই। চকুকেইটাৰে পিৰিক পাৰাককে চাই শিশুটিৱে যেন মহিলা চিকিৎসকগৰাকীয়ে কোৱা কথাবোৰ বুজিবলৈ যত্ন কৰিছে।

চিকিৎসকগৰাকীৰ মুখত শুনা গৈছে বাংলা ভাষা। চিকিৎসকগৰাকীয়ে আদৰসনা কৰ্তৃত্বসুলভ ভংগীৰে শিশুটিক বাংলা ভাষাত কৈছে “বুজিছনে..এনেদৰে শান্ত হৈ থাকিবি। মাক আমনি নকৰিবি। তই গুড বয় হয় ন? ভাল ল'ৰাই মাকক আমনি নকৰে।ভাল ল'ৰাই এনেদৰে শান্ত হৈ থাকে। কিছুপৰ ৰৈ মহিলা চিকিৎসকগৰাকীয়ে শিশুটিলৈ চাই পুনৰ কৈছে- “তোক মই বকি থকা নাই দেই, বুজাই হে আছোঁ কথাবোৰ। তই বুজিব পাৰিছ নে নাই।” আলফুলীয়া দেৱ শিশুটিয়ে চিকিৎসকগৰাকীৰ সকলো কথাই বুজি পোৱা নিচিনাকৈ তেওঁৰ মুখলৈ চাই আছে।

এই সুন্দৰ ভিডিঅ’টো ক’ৰ আৰু কেতিয়াৰ সেয়া স্পষ্ট হোৱা নাই কিন্তু ই ছ'চিয়েল মিডিয়াত ভাইৰেল হৈ পৰিছে। বহুলোকেই শ্বেয়াৰ কৰিছে ভিডিঅ’টো। এদিন যেতিয়া শিশুটি ডাঙৰ হ'ব, কথাবোৰ বুজি পোৱা হ'ব তেতিয়া সি পৃথিৱীলৈ অহা প্ৰথম দিনটোৰ ভিডিঅ' দেখি নিশ্চয়কৈ আৱেগিক হৈ পৰিব।

আৰু পঢ়কঃ যাদৱ পায়েঙৰ দৰে তামিলনাডুতো আছে এজন মানুহ; তেওঁৰ বিষয়ে জানো আহক