ভাৰত-কানাডাৰ কূটনৈতিক সম্পৰ্কত তীব্ৰ অৱনতি ; কানাডাৰ পৰা মচুৰ দাইলৰ আমদানি হ্ৰাস কৰাত চিন্তিত কানাডিয়ান কৃষক

ভাৰতত দৈনিক গ্ৰহণ কৰা খাদ্যত মচুৰ দাইলৰ তৰকাৰী তৈয়াৰ কৰা হয়। ভাৰত মচুৰ দাইলৰ আমদানিৰ ওপৰত নিৰ্ভৰশীল। ভাৰতে বৃহৎ পৰিসৰত কানাডাৰ পৰা মচুৰ দাইল আমদানি কৰে। ৰয়টাৰৰ প্ৰতিবেদন অনুসৰি দুয়োখন দেশৰ মাজত উত্তেজনাৰ বাবে দুয়োখন চৰকাৰে বাণিজ্যত বাধা আৰোপ কৰিব পাৰে বুলি ব্যৱসায়ীসকলে আশংকা কৰিছে। ওলাম এগ্ৰি ইণ্ডিয়াৰ জ্যেষ্ঠ উপ-সভাপতি নীতিন গুপ্তাই কয় যে এনে আশংকাই ব্যৱসায়ীসকলক অশান্তি দিছে। কিন্তু চৰকাৰৰ এগৰাকী জ্যেষ্ঠ বিষয়াই কয় যে ভাৰতৰ এনে কোনো পৰিকল্পনা নাই আৰু চৰকাৰে আমদানিকাৰকক এনে কোনো নিৰ্দেশনা দিয়া নাই। কানাডাইও নিজৰ ফালৰ পৰা এনে কোনো সিদ্ধান্ত গ্ৰহণ কৰা নাই যিয়ে দুয়োখন দেশৰ মাজৰ সম্পৰ্ক আৰু অধিক অৱনতি ঘটাব পাৰে।

মচুৰ দাইলৰ উৎপাদন হ্ৰাস পোৱাৰ পাছত ভাৰতে ২০২৩ চনত কানাডাৰ পৰা বৃহৎ পৰিসৰত মচুৰ দাইল আমদানি কৰিছে। ব্যৱসায়ীসকলে কয় যে এতিয়ালৈকে আমদানি বাতিলৰ কোনো উদাহৰণ পোহৰলৈ অহা নাই। মচুৰ দাইলৰ উৎপাদন হ্ৰাস পোৱাৰ পিছতে মূল্যবৃদ্ধি দেখা গৈছে। কিন্তু কানাডাৰ প্ৰধানমন্ত্ৰীৰ এই বক্তব্যৰ পিছত কানাডাৰ পৰা যোগানৰ মূল্য ৬ শতাংশ হ্ৰাস পাই প্ৰতি মেট্ৰিক টনৰ দাম ৭৭০ ডলাৰ হৈছে। ২০২২-২৩ চনত কানাডাই ভাৰতলৈ মচুৰ দাইল যোগান ধৰা সৰ্ববৃহৎ দেশ আছিল। ২০২৩ চনৰ ৩১ মাৰ্চলৈকে ভাৰতে কানাডাৰ পৰা ৩৭ কোটি ডলাৰৰ ৪.৮৬ লাখ মেট্ৰিক টন মচুৰ দাইল আমদানি কৰিছিল। যিটো ভাৰতৰ মুঠ আমদানিৰ ৫০ শতাংশতকৈও অধিক। চলিত বৰ্ষৰ এপ্ৰিলৰ পৰা জুলাই মাহৰ ভিতৰত যোৱা বছৰৰ তুলনাত কানাডাৰ পৰা মচুৰ দাইলৰ আমদানিৰ ক্ষেত্ৰত ৪২০ শতাংশ জঁপিয়াই পৰিছে।

ভাৰতত প্ৰতি বছৰে ২৪ লাখ মেট্ৰিক টন মচুৰ দাইল খোৱা হয়। আনহাতে ঘৰুৱা উৎপাদন মাত্ৰ ১২ লাখ মেট্ৰিক টন যিটো আমদানিৰ জৰিয়তে পূৰণ কৰা হয়। কিন্তু কানাডাৰ পৰা মচুৰ দাইল ক্ৰয় হ্ৰাস পোৱাৰ পাছত অষ্ট্ৰেলিয়াৰ পৰা ক্ৰয়ৰ পৰিমাণ বৃদ্ধি পাইছে।আগন্তুক বিধানসভা আৰু লোকসভা নিৰ্বাচনৰ প্ৰতি লক্ষ্য ৰাখি ভাৰতৰ বাবে কানাডাৰ মচুৰ দাইলৰ আমদানিক আওকাণ কৰাটো অতি কঠিন হ’ব। শেহতীয়াকৈ গ্ৰাহক পৰিক্ৰমা মন্ত্ৰালয়ৰ সচিব ৰোহিত কুমাৰ সিঙে কৈছিল যে ভাৰতে কানাডাৰ পৰা মচুৰ দাইলৰ আমদানি বৃদ্ধি কৰিবলৈ ওলাইছে যাতে উৎসৱৰ বতৰত মচুৰ দাইল গ্ৰাহকক উচিত মূল্যত উপলব্ধ কৰিব পৰা যায়৷