ভাৰতবৰ্ষৰ মাজেৰে বৈ থকা এখন ব্যতিক্ৰমী নদী, যি যায় দি যায় বহু লোকক জীৱিকাৰ সন্ধান

 ডিজিটেল ডেস্ক : ভাৰতবৰ্ষ এখন নদীপ্ৰধান দেশ আৰু ইয়াৰ বিভিন্ন প্ৰদেশেৰে বৈ আছে ৪০০খনতকৈও অধিক নৈ-উপনৈ। কিন্তু আজি আমি ক’ব ওলাইছো এখন ব্যতিক্ৰমী নদীৰ কথা, যি বাকী নদীবোৰতকৈ সম্পূৰ্ণ পৃথক। যাৰ পানীত পোৱা যায় বহু সোণ। সেই নদীখনৰ নাম জানেনে?

 পানীত সোণ পোৱা এই নৈখনৰ নাম সুবৰ্ণৰেখা। কেৱল নৈখনৰ নামটোৰ অৰ্থ সোণ নহয়, ইয়াৰ পানীতো পোৱা যায় বহুতো সোণ। এই নৈখনে এতিয়া হৈ পৰিছে স্থানীয় লোকৰ একমাত্ৰ উপাৰ্জনৰ উৎস। ঝাৰখণ্ডৰ তামাৰ আৰু সৰন্দাত যুগ যুগ ধৰি নদীৰ পৰা সোণ পৰিশোধন কৰি জীৱিকা নিৰ্বাহ কৰি আহিছে ইয়াৰ স্থানীয় বাসিন্দাসকলে। এই নৈৰ উৎস ঝাৰখণ্ডৰ ৰাজধানী ৰাঁচীৰ পৰা প্ৰায় ১৮ কিলোমিটাৰ দূৰত। ঝাৰখণ্ডৰ পৰা আৰম্ভ কৰি ই প্ৰথমে পশ্চিমবংগৰ মাজেৰে আৰু তাৰ পাছত ওড়িশাৰ মাজেৰে বৈ গৈ শেষত বংগোপসাগৰত পৰে।

 উল্লেখ্য যে, বহু বছৰ ধৰি বিজ্ঞানীসকলে পৰীক্ষা-নিৰীক্ষা আৰু বহু প্ৰচেষ্টা কৰিও আজিপৰ্যন্ত সুবৰ্ণৰেখা নদীত সোণ কিয় পোৱা যায় সেই কথা স্পষ্ট হ’ব পৰা নাই। ৪৬৪ কিলোমিটাৰ দৈৰ্ঘ্যৰ এই নদীখনৰ স্থানীয় নাম ‘কাৰকৰী নদী’। কিন্তু বিজ্ঞানীসকলৰ মতে নদীখনৰ অধিকাংশই শিলৰ ওপৰেৰে বৈ যায়, সেয়ে তাৰ পৰা সোণ অহাৰ সম্ভাৱনা বেছি। কিন্তু তেওঁলোকে নিশ্চিতভাৱে একো ক’ব পৰা নাই।

 অৱশ্যে এই নদীৰ পৰা সোণ উলিওৱাটো একেবাৰে সহজ কথা নহয়। ইয়াৰ বাবে তেওঁলোকে গোটেই দিনটো পৰিশ্ৰম কৰিবলগা হয়। সোণৰ পৰিমাণ অতি কম হোৱাৰ বাবে ইয়াৰ স্থানীয় বাসিন্দাসকলৰ আয় বৰ বেছি নহয়। দিনটোৰ বহু কষ্টৰ অন্ততহে সৰ্বাধিক ৬০ৰ পৰা ৭০টা সোণৰ কণা সংগ্ৰহ কৰিবলৈ সক্ষম হয়। এই সোণৰ কণা ৮০ৰ পৰা ১০০ টকা (ভাৰতীয় টকা)ত বিক্ৰী কৰিব পাৰে। সেই হিচাপে এই কামত জড়িত শ্ৰমিকসকলে মাহে প্ৰায় ৮ হাজাৰ টকা উপাৰ্জন কৰিব পাৰে।